#12 – Sgarabatul
Il so leam cul mont al jere fûr dal vade, al veve une conession passive che i permeteve di percepî dome i stimui ator di se, ma no di interagjî cul ambient che lu circondave. Sin de nassite al soreviveve daûr di cheste bariere cence imprescj a puartade di man par esprimisi, fin che ai dîs agns al discuvierzè inte musiche un fîl condutôr, une vie di jessude par i siei sintiments.
Al passave lis oris a sunâ il violin inte sô stanzie, la ugnule suaze alì che si sintive al sigûr e di dulà che nol jere mai jessût in mût fisic. Di solit si fasevin adunadis ator dal so barcon par sintîlu, i vecjos dal paîs a puartavin cjadreis e a restavin in scolte par oris e straoris.
Ducj in chel piçul borc a cognossevin Lessi, e lui, intun mût particolâr al cognosseve ognidun di lôr.
La uniche presince che al veve vût simpri dongje al jere so fradi, Marc, il so zimul, une persone che e veve dedicade la sô vite a studiâ siencis, stiçade a dâ une soluzion ae cundizion di isolament dal so avuâl. Alfin, daspò di un grum di agnorums al rivà insom e al svilupâ un imprest che i permetè di decodificâ la sucession des notis sunadis di Lessi in peraulis. La dì che l´argagn al fo pront, al puartà la machine inte sô stanzie e prin di tacâ la prove i spiegà a Lessi la intenzion dal so lavôr e i domandà di sunâ alc, cualchi robe che lui al veve voie di pandi in chel moment.
La sorprese e fo badiâl, la machine in mût clâr e butà fûr: “O sin metûts adun sin dal concepiment, o sin une stesse ment, o ai vivût fin ca la tô vite, o viôt chel che tu viodis, o sint chel che tu sintis”.
Marc al colà jù tal paviment, spasimât, al discolegà la machine e scjampà vie de stanzie. Lu scjafoià une sensazion di invasion che e distudà la gjonde dal sucès vût cul argagn. Sot di un efiet di agjitazion si rindè cont che l´imprest che lu veve ossessionât par agns cumò i veve dât un berdei morâl di risolvi.
di Lenart Gjavedon (Scalembrut)
#1370
