CorseCurteSetembar#03 – Lis mans amorosis

#03 – Lis mans amorosis

L’aiar al jere fer sot il morâr chê matine di Istât. Al veve cjatât l’imprest pierdût te jerbe alte dal zardin: al jere ancjemò a muardi la tiere a stentis, dut inrusinît. Il soreli al veve mangjât dute la piture dal mani cence lassâ nancje il ricuart sfantât dal colôr.
Cun tenarece sal jere puartât tal curtîl, sot de ombrene che lu protezeve dal soreli afamât, ma no dal cjalt rabiôs. Lis moscjis a svolavin inmatunidis de lûs, ma l’om al cjalave dome chel puar badilut che al niçulave tes mans come un frutin scaturît.
Al veve scomençât cul gjavâ la tiere dure tacade dal timp, biel lassant il metal libar. Jenfri il disordin de cjase, al veve cjatât une vecje cjarte di veri e si jere impegnât a puartâ fûr chel rusin naranç che al maglave il badilut. Viers misdì al ve la sodisfazion di viodilu lusignâ une altre volte.
Al polsà di pôc, juste par un bocon in pîts cjalant ancjemò il so pupil lassât sore la taule malmetude. Nancje lis moscjis a vevin voie di svolâ cun chel cjalt, ma l’om al someave di no inacuarzisi di nuie. Cuntun bussulut di piture nere e un pinel cun cuatri pêi che al veve viodût masse Inviers al tornà a vore.
Al capì subit che al sarès stât miôr picjâ l’imprest intun ramaç, par piturâlu cence lassâsi i dêts neris. L’amont lu veve cjatât cuant che al finive la sô opare. Cjapantlu pe ponte, lu zirave par viodi di dongje dute chê perfezion che al jere stât bon di fâ sflorî cun lis sôs mans.
Finalmentri, strac, al jere lat a durmî prime di miezegnot. Pocjis oris dopo al jere rivât il davoi. Il neri dal cîl si impiave a trats dai lamps e la gnot e murmuiave cui tons tant che un vieri barbon incjocât. Si jere dismot cul sun dai prins gots sul tet, grues come pugns di frutin. Al veve corût sot dal morâr par realdî il badilut de ploie. Sal puartà tal jet e si indurmidì cul cjossul jenfri des mans.
Cussì lu cjatarin doi dîs dopo, frêt.
Cuant che i gjavarin l’imprest, maraveâts, a croderin di sintî ancjemò tal mani un pôc dal clip restât de sôs mans amorosis.

di Noemi Salva (Passarute)
#1361