CorseCurteLui#23 – Aghe sute

#23 – Aghe sute

“No stâ lâ di là dal sut!” mi dîs simpri mê none Lukzenerper cuant che mi viôt cjapâ sù la biciclete par lâ a zuiâ cui amîs. O vin il permès di torzeonâ par dute la boschete secje, ma traviersâ la vastitât di claps dulà che une volte al jere il grant flum no si pues. “Parcè?” “Su mo Kraputnyk, tal ai za dit mil voltis! Par di là a son chei di là dal sut e nô no stin a messedâsi cun lôr!”
A mi, Kraputnyk, undis agns e la cuinte elementâr a pene finide, cheste robe mi somee di no crodi. La ultime montane dal flum e je stade tal 2024, tal 2040 la ultime ploie: cussì e à dit la mestre Graetzenerper. La ultime gote di aghe e à corût jù jenfri chei claps aromai secui indaûr, ma pai abitants di Vilestice e val ancjemò la division vieronone tra chei di ca e chei di là de aghe. Malfidâts e fals chei di là, onescj e e sclets chei di ca. Dome che cumò si dîs di ca o di là dal sut.
O voi a cjoli il gno amì Bikzy e vie pai trois che o cognossìn dome nô. Il cjalt nus scjafoie: dopo e rive une sbave di aiar ma nancje chê no jude: al è come se cualchidun al ves impiât un fon zigant! O sin tal mieç de grave, anzit, cence savê le vin scuasi scjavaçade. Masse fature a tornâ indaûr! Pôc lontan o viodìn un trop di figârs di Indie: no fasin cuissà ce ombrene, ma alc al è alc e nuie al è nuie.
O sin rivâts: cumò o sin di là dal sut e e je la prime volte. Robononis! Ma dopo il prin moment di maravee, Bikzy si cjale ator e al dîs: “Cactus dapardut! Al è dut compagn precîs come par di ca dal sut!”
“Ma cumò che o sin par di là, par dî di ca vino di dî di là? E par dî di là vino di dî di ca?” Domandis masse complicadis par doi fruts sudadiçs e stracs come nô.
“Anìn a dîlu a la none, che di ca o di là no je diference!”
Dal sigûr jê nus crodarà, e e disarà a chei dal paîs che cheste division no à plui sens, o cussì o speri. Sì sì, e larà cussì. O no? Il griâ des cialis al jemple il cîl.

di Stralunade (Atletic Gjatui)
#1332