La femine dal Ostîr

Ducj a san che i amîs di cuant che si jere fruts a son chei che i si perdone dut, ancje un brut caratar! Zuanin dut câs al paronave cualsisei tecniche par rindisi antipatic e disgrât ma, soredut, al jere tant cragnin.
Ogni sabide la cunvigne e jere al Bacar, la ostarie in place indulà che si comentavin i fats de setemane, si intrigavisi dai fats di chei altris, si tabaiave dai muarts piturâts sul gjornâl e si coionavin i amîs. Ancje l’ostîr al faseve part dal zûc, al cognosseve i siei clients e i lôr segrets, tant di podê dâ des voltis cualchi botonade juste par gjavâ fûr une ridade.
Zuanin, precîs come un orloi, al rivave simpri aes undis e trê cuarts. Di fat i siei amîs si cjatavin a undis e mieze e cussì a varessin bielzà ordenât, tant di scugnî domandâ al compagn che al si zontave: “ce bevistu?”. In cheste maniere il zîr al jere ufiert e Zuanin a nol veve nancje di fâ fente a tirâ fûr il tacuin. Al steve ancje cetant atent di jessi l’ultin a proponi un “altri zîr”, tant che par usance, spietant che al batès almancul misdì e mieç, ore limit par i compagns di distrigâsi a lâ a gustâ a cjase. Cun cheste tecniche al rivave a sparagnâ di ufrî il zîr che, prime o dopo, i sarès tocjât paiâ e ancje a ridi vie dai amîs clamantju sotans e sometûts a lis lôr feminis che ju spietavin a cjase. Lui, vedran, ju saludave disint: “Cuant che tu jentris inte gabie, saludimi la tô femenute!”
Ogni sante sabide a finive cussì, Zuanin poiât al banc che, cun la tace in man tant che un brindis, al menave pal nâs. Guelfo, l’ostîr, al pative cheste ande ma nol cjatave le idee juste par fâle paiâ, tant di confidâsi cun la sô femine che, jessint une buine blave, e veve soflât bot e sclop une strategjie.
La sabide seguitive Zuanin al finive i agns e, tant par no riscjâ e come ducj i agns, al veve decidût di dismenteâsi biel a pueste il tacuin a cjase. Puntuâl a lis undis e cincuante, cinc minuts in plui di sigurece, al fasè la sô jentrade al bacar ma, smaraveât, nol cjatà ni i amîs ni l’ostîr. Scaturît i domandà ae femine di Guelfo che e stave netant tacis e jê, ridint sot de creste, lu indreçà inte stanziute risiervade par solit ai zûcs di cjartis. Di sigûr si trate di une fieste a sorprese par il gno complean! al pensà Zuanin. Fasint bocje di ridi al vierzè la puartute e al jentrà discjadenant un batiman di scjas, ma di bot al nasà la garbe. Cjantant “tancj auguris” a si jerin alçadis in pins dutis lis feminis dai soi amîs, cun l’ostîr Guelfo –vistût cuntune mude di camarîr di gale – che al vierzeve butiliis da la ribuele plui cjare dal marcjât. Zuanin sul moment al restà cence peraulis ma, capide le antifone al si inventà une cunvigne une vore impuartante. Zirâts sù i tacs par cjapâ la puarte, dut câs si cjatà denant de puarte la femine di Guelfo che, cun bocje ridint, i slungje la note. Pôc che i vignìs un colp a viodi il totâl ma, par no fâ une figure sclagne, al tirà fûr la scuse di vê dismenteât il tacuin. Mi displâs, i dîs le ostere, ma culì no si fâs credince a nissun. E al è cussì che Zuanin al finì a lavâ e suiâ tacis par dute la zornade, sotan e sometût ae femine…dal ostîr!

di Guido Covàs
#1309