Di là de cortine

Al jere restât cence fuarcis, la plui impuartante mission dai servizis segrets dal Canadà e stave par jessi completade, ma e podeve ancjemò finî te maniere plui brute, sul confin di Gurize. Clark al jere l’agjent incaricat di recuperâ i progjets dal CF-105 ARROW, robâts dai rus, la mission e jere dute interne al Directorate of Security and Intelligence, cence coinvolziment dai servizis americans.

Julia e jere un ex inzegnîr de Mikoyan Gurevich che i veve fat vê i progjets robâts, Sasha invezit e jere un ex KGB che lu veve judat a scjampâ passant pe Jugoslavie. Dutis dôs a volevin scjampâ de Union Sovietiche. Cumò ducj i trê a jerin a pôcs chilometris dal confin ma a savevin di jessi scorsenâts. In câs di faliment ju spietave la fusilazion imediade o il Gulag, se invezit a finivin intes mans dai jugoslâfs si lave a Goli Otok che nol jere di sigûr miôr. A vevin dome une pussibilitât chê dì: un C-130 cul sisteme Fulton al varès fat une violazion dal confin cu la scuse di une avarie. Il sisteme al jere pensât par massime dôs personis, no trê, in plui al doprave un balon di segnalazion che al varês podût jessi notât dai avions nemîs. L’impat cu la cuarde dal avion al fo trement, intant che ju cjariavin a crodevin di finî di un moment a chel altri tirâts su lis elichis, e ancje une volte cjapâts sù a vevin cetante pôre di jessi intercetâts.

Rivâts su la piste di Risan, rulant cence fermâsi, a vegnin flancâts di un camion cence insegnis, ducj trê a vegnin trasferîts in corse lassant che il C-130 si tiràs sù ae fin de piste. A vegnin puartâts intune cjase dongje de stazion di Palme, li i vegnin dadis des monturis stranieris e, traviers lis antighis galariis di mine, trasferîts intune des casermis dentri de citât. Intal doman di matine, nissun dai soldâts de caserme al saveve cuant che al jere rivât chel uficiâl olandês compagnât de femine e de sûr che nol fevelave cun nissun. Ma il moment piês al à ancjemò di vignî: l’ordin di distruzi i progjets recuperâts! Stiçât, Clark al cjate cui ordins une buste cuntune direzion di pueste di Palme: culì i progjets a saressin stâts platâts, invezit che distruts come te version uficiâl.

di Luche Bagnarol
#1307

1 comment