CorseCurteLui#11 – Çucar

#11 – Çucar

Si clamave Rino, ma ducj i disevin Çucar e lui no si scomponeve.
Al viveve di bessôl e al faseve il vuardian de aghe di irigazion pal Consorzi di bonifiche.
Di Istât i tocjave vierzi e sierâ i sifons e i puartelons des canaletis e controlâ il rispiet dai turnis, di mût che i contadins, che cul cjalt a lavin subit sù di zîrs, no si cridassin e no si robassin la aghe sore dut vie pe gnot.
A dutis lis oris si presentavin cjase sô a protestâ par alc e cussì, spes e vulintîr sul misdì par polsâ, al lave a poiâsi su lis balis di fen te stale daûr la loze: podevin ben bati il batecul sul puarton, lui nol dave segn di vite. Cul risultât che par chel fisc si le cjapave cun lui ancje il vicinât.
Intun turni di gnot si jere indurmidît sore un sifon e cuant che a la albe si jere dismot, la aghe e veve vût timp di stramontâ dai agârs alagânt la stradele fintremai al asfalt de strade comunâl: par trê dîs un pantanâr che Diu nus vuardi.
Ta chê volte al à vût il so cefâ a convinci chei dal Consorzi che al jere dome tant strac e no plen di aghe… di vît.
Vedran par sante scugne, la domenie al lave a fantatis mo cuntun mo cuntun altri dai vedrans dal paîs; plui di spes cul so amì Chile Çavatin.
Une sere, te ostarie al veve contât che sul stradon di Tisane si jere fermât a cjoli sù dôs autostopistis.
– Scomet che tu âs rivât a cumbinâ alc – i veve cimiât l’ostîr, une lenghe sacramentade buine di tirâ fûr altârs e tabernacui ancje ai predis.
– No, porcofûr, nancje montadis – si jere lamentât Çucar.
– Parcè po, no àno volût?
– No, no ài volût jo; a insistevin a dî: “Jè-solo, Jè-solo”. Porcofûr, no viodevino che al jere ancje Chile Çavatin li cun me? No podevi mighe butâlu jù e fâlu tornâ indaûr a pîts.
Agns dopo, fasint la curve sul puint dal Cormôr a Mortean, si è ribaltât cul Ape e nol è plui tornât in ca.
Cumò la sô cjase e je in vendite e no sai cui che al fâs il vuardian de aghe tal so puest, ma a dî il vêr aghe tes canaletis beromai a ‘nd è avonde pocje.

di ***
#1***

1 coments On CorseCurteLui#11 – Çucar

  • Stories bieles e lontanes indulà piçui lavôrs e davin tante sodisfazion, massime sul teme libertât, e dopo e reonavin ancje a meti alc sul desc. Lussian

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît