CorseCurteLui#04 – Vite

#04 – Vite

Glup glup glup. Ce scûr ch’al è culì.
Cuant che i spalanchi i voglins si impâr cualchi riute plui clare, ma no ai mai timp di fermâmi a pensâ a ce che e je. Mi intrighin di plui i sunôrs.
“Atenzion a no vierzi la bocje.”
La vôs e rive come di lontan, ma jo le capìs istès. O ai di tignîi la bocje sierade. Cuissà parcè. O stoi in vuaite par un pôc, ma o sint dome sclipignâ. Intant m’al segni: tignîi la bocje sierade.
“Slargje i braçuts cussì, patafe fuart! Viodistu che tu stâs sù?”  E vie une altre sclipignade.
Mi segni ancje cheste: slargjâ i braçuts e patafâ fuart.
Urca, ce salt, aie di sei cheste la gjeromete? I soi lât sotsore, ce fadie a tornâ a metisi sentâts.
“Cumò bat i piduts. Eco, cussì, brâf!”
La vôs e va e e ven, lizere e un tichinin a scats, come che a scats mi môf ancje jo. Glup glup glup.
“Aurelio! Cjapilu, ch’al va sot. I son scjampâts i braçalets!”
La vôs cuasi e sberle. Il sclipignâ al devente rumôr di alc che al peste e al spude. Di colp al ven cidin, e cuant che il sunôr al torne al è come se chi dentri al sdrondenàs dut, sot, parsore e in bande e ancje jo mi ribalti e no rivi plui a stâ sentât.
“Ninin, ninin!”
“Mame, mame!”
Une vôs picinine si zonte, e ven cussì dongje che cuasi mi fevele intes orelis.
“Mame mame, ce pôre.”
Un cjaldin ch’al console mi si spant dapardut. O soi cussì content che il cûr al tache a cori.
“Aurelio! Aurelio!”
“Ce isal cumò? Tonut al sta ben, no?”
“Sì, al sta ben, ma jo…”
Lis vôs a son bassis. Une ombrene nere che mi passe devant dai voi a cuvierz il scûr apene sclarît.
“Dele, ise bielzâ ore?”
“Aurelio!”
I sunôrs si sintin miôr di prime. Al è alc che mi sburte e mi pâr che o ai di movimi, di lâ ancje jo, di cori cun le aghe. Cemût disevie la vôs? Ten la bocje sierade. Benon, o sieri la bocje. Viodìn se mi impensi ce ch’al ven cumò. Ah sì: slargjâ i braçuts e patafâ fuart. Fate ancje cheste.  E daspò i piduts… La aghe e je finide! E cumò? Ce mâl tal cuel! Ce voie di vaî.
“Dele, sburte… cussì… brave!”
“E jê une frute, siore!”

di ***
#1***

2 coments On CorseCurteLui#04 – Vite

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît