#12 – Che il soreli ti cjali
Un pît te aghe, a planc, tacant de ongule dal poleâr. La aghe e stralûs tal aiar colôr di viole, intant che lis fueis dal piçul bosc a piturin cul lôr profîl l’ôr de sere. Lis lôr sagumis a spice a son striis plenis di fam. I dêts dal pît, la plante e la cjavile interie si bagnin tal licuit cidin.
A son ducj li e lu cjalin cun solenitât, parfin i fruts a àn smetût di cori ator e si son fermâts, come incantesemâts. Il vieli si svicine e lu sburte par che al jentri te poce cence esitazion. Cumò il zovin al è dut bagnât, al stâ in pîts a fature te aghe che e devente simpri plui fonde. “Che il soreli ti cjali!”, al dîs il vieli. “Che il soreli ti cjali!”, a rispuindin ducj.
Sô mari lu vogle in maniere indecifrabile. Ise preocupade o braurose? Aie pôre?
Ancje il vieli lu cjale cun intensitât, come par dâi fuarce. Po si slontane planc, murmuiant preieris.
Lui al sa che cumò al à di restâ te aghe fin che ducj no saran lâts vie.
Al cjale in sù e al cîr la lune. E je lontane, si viôt a pene tal viole di chel cîl. Daûr dai grancj arbui al intive la presince de citât, aromai mieze sbandonade, e il fum dai fûcs che cualchidun ancjemò al pie sui gratecîi.
La aghe pantanose lu cercene e lu braçole. Aromai al è restât bessôl, il viole al devente simpri plui neri, lis spalis e i braçs simpri plui blancs. Lis riutis de sô piel ingrispade i fasin sintî sgrisui di frêt.Nol è il prin che al scugne slontanâsi dal vilaç e nol sarà l’ultin, i uciei a àn svolât intune maniere masse clare par podê fâ fente di nuie. Di cuant che e je stade creade, la Entitât no lasse passâ lune cence domandâ un sacrifizi. Cumò al tocje a lui. Ma nol à pôre. Al fasarès di dut par judâ il vilaç, so mari e i soi fradis. Doman al cricâ dì al jentrarà te poce cuntun grant clap peât intôr. Al è rivât il timp di lâ insom. Al siere i voi e al cîr di sintîsi aghe, pantan, fum, lune. “Che il soreli mi cjali”, al sunsure.
di Margarite Cogôi (Volketitrei-Liga)
#1294
