CorseCurteJugn#11 – Cûr, respîr e cjâf

#11 – Cûr, respîr e cjâf

Come un cordon di luvin, il cablut a spirâl al zonte la orele al piçul cronometri analogjic.
Il poleâr al vibre un moment, pandint un pocje di indecision. Ma une fuarce misteriose lu met in moto. In curt il boton al è scliçât. Cumò no si pues plui tornâ indaûr.
Il ticament al scomence, segnant il timp.
Al è pôc plui svelt dal bati dal cûr. Sì, il cûr. Il tambûr uman che al rivoche fuart dentri, cumò al à di ralentâ, dismolâsi, cjatâ un gnûf pas.
Eco che in zûc al jentre il respîr. L’aiar. Dentri e fûr, alt e bas. Prin al jemple, po al svuede. Un mateç che al devente une naine, dolce ma precise.
Ma nol baste.
Al covente un regjist, un coordenadôr che al controli lis speris dal cuarp, che al movedi il centri in mût di no pierdi l’ecuilibri. Il cjâf. Lui al à di guviernâ dut, subit, prin che al sedi masse tart.
Cûr, respîr e cjâf. Cumò dut al è perfet. Baste dome concentrâsi par no pierdi il ritmi e, robe piês, berdeâsi e là… fûr timp.
La man, ferme e sigure, si poie cun calme e lentece sul pomul sagrinât.
Cûr, respîr e cjâf.
Cûr, respîr e cjâf.
L’om cumò al è cuiet. Il ticament al va indenant ma lui no lu sint plui. Al è jentrât dentri. Il cerviel al à cjapât il comant e al vuide lui. Sigûr, braurôs, cence pôre di lâ fûr strade.
Il pomul al zire viers çampe, prin svelt e po plui planc, frenant. Il pinsîr al dissegne un numar. Il prin, il plui impuartant.
Tic!
L’om al cjape coragjo. Al è dentri tai timps. Velu alore il pomul che al zire di chê altre bande, cheste volte planc, plui regolâr. Cemût mai? Subit sclarît: il secont numar al è dongje dal prin.
Tic!
Vie svelts cumò da bande contrarie. Velu il tierç numar che si svicine, fasintsi spazi jenfri chei che a vegnin prime di lui. Conte planc. Ultime cifre. Cualchi grât ancjemò…
Tic!
La mantie e zire, liberant une sfese di lûs.
Cumò il timp al pues fermâsi.

di Massim Furlan (Sbreghebalon)
#1293

2 comments