CorseCurteJugn#08 – Devantdaûr

#08 – Devantdaûr

Di tant si sintive di jessi fûr cul gamelot, al veve i pinsîrs ingredeâts, a moments libars, a moments impresonâts. Al lave a bocons pe vite cuntune spine, di divignince no cognossude, che lu becave ogni tant e che la sience no veve rivât a gjavâ vie. Si sintive un acuilon che al voleve disleâsi de cuarde, e nol rivave a bon. Strac di cjoli la aghe cul zei par ribaltâ la vicende al decidè di fâ chel viaç che i zirave tal cjâf di tant timp.

Cuant che lu veve discorût cui amîs cualchidun lu indreçà viers la Indie, salacor l´indianissim al sarès un portâl interessant dulà dâ une voglade. Ancjemò i vevin conseât di là in Lontan Orient dulà che la culture e je plui involuçade cul spirt, i disevin.
A dî il vêr nol veve masse pretesis sul dulà là, pûr sì, di fâ in mût di cjapâ moments par rifleti, par cjatâ la suaze de sô esistence, une sorte di belanç de vite che al ven fât cuant che il glimuç al è imbroiât. A chel pont si metè in vore savint che l´unic destin ciert che al veve al jere la introspezion.

Ae fin dai conts il viaç al durà cuasi plui di un an. Al incuintrà personaçs che nol veve mai pensât che a esistessin. Al partecipà a rituâi religjosis e pagans che i permeterin di rivà a viodi un cjapitul de sô vite che il cerviel, in cualchi mût, al veve blocât.
Di precîs al rivà a intraviodi il moment just dulà che al veve pardabon falât la vie, si inacuarzè che chê decision cjapade plui di trente agns indaûr e lave pardabon cuntri al so spirt. Cumò al scugnive tornà te beorcje e cjapâ la strade juste che chel viaç devantdaûr i veve palesât.

Al è cussì che al ribaltà la clessidre e al tacà il prin dì de sô gnove vite.

di Lenart Gjavedon (Scalembrut)
#1290

2 comments