CorseCurte#07 – Aghis soteranis

#07 – Aghis soteranis

L’obietîf di vuê al è di rivâ aes Bocjis dal Timau. Mariano al cor dilunc il troi Rilke par cirî lis aghis cuietis di risorgive, che a dismolin la sô rabie, che a bonin il so torment…
Si à butât fûr di cjase cuant che il cjâf al jere li li par esplodi, al sintive ancje il bati dal cûr: e chest e je une robe avonde dificil ancje par un yogi! La frase e zirave cence fin tal so cjâf come un mantra che al fruie la anime: Parcè vevio dit di no?… parcè vevio dit di no?…
Cuintri lis sôs sperancis il so infier al veve fât il viaç cun lui. Al veve mudât Mar del Plata par Triest: mâr par mâr; trop piçul come cambiament di sene par dî il vêr, ma al à cambiât il mâr sporc de Argjentine par un altri plui vert e pulît; al veve mudât il senari ma in prin plan al restave dome lui: la realtât i domandave di jessi il protagonist, ma il so sprolungjament maladiç al jere chel che al cjapave il testemoni.
Parcè jerio scjampât di buride? Par dîle dute: ce robe impussibile i vevie domandât di fâ Manuel? Dome di jessi, biadelore, se stes!, di jessi feliç come mai prime, di lassâ stâ di vê pôre di amâ  e di jessi amât soredut. Chest nol jere un altri sium irealizabil: infin al veve cjatât il compagn ideâl di vite.
Mariano al cor par un troi stret e plen di pieris slissis, timp indaûr al à lassât a çampe lis parêts di San Zuan in Tube e al cjape la stradele di rive jù, lis gjambis a duelin: al è un pôc fûr di forme: a son bielzà cuatri mês cence alenâsi, il mantra al torne dome un ritornel: parcè che vevio… porco boie! al sarà miôr fermâsi un tic e cjapâ flât, chescj claps maledets!…
Chest al sarà il so ultin pinsîr coerent, un cogul grant e slissot plui di chei altri lu fâs colâ intal vueit e prime di spacâsi il cjâf cuintri lis pieris dai scois al torne a ripetisi: parcè vevio dit di no?… parcè che vevio dit di no?

di Marcelo Del Mestre (Argo Patùs)
#1316