CorseCurteMai#19 – Lâ di cuarp intune filande

#19 – Lâ di cuarp intune filande

Gjo, trops agns âstu? Ben, se tu âs une cierte etât o soi sigûr che tu âs cualchi ricuart di contâ su lis filandis. La storiute che o ti conti vuê e à come protagoniste, inmò une volte, la mê none.
Jê, di piçule, e viveve tune grande famee: trê fradis metûts insiemi a vivi te filande dai gjenitôrs. Une sdrume di fantats e fantatis che a saltuçavin ator pal pedrât, cumbinantindi di ogni colôr. Nancje dîlu.
I grups che si definivin a jerin cussì: i grancj a stavin tra di lôr, istès i piçui; ai grancj i plaseve fâ i dispiets ai canais e a chescj stiçâ i fantats.
Te filande a ‘ndi sucedeve une ogni moment, ogni ocasion e jere buine par fânt une. E jù ridi, di pissâsi intor.
Chê dì Ada e steve zuiant cui siei cusins, i solits de compagnie: Ondina e Renato. Lôr trê a jerin i plui spirtâts de famee, jessint i plui piçui e, si sa, i mancul considerâts de nidiade. A jerin sù sul cjast, a zuiâ di platât daûr di cualchi imprest, drenti cualchi casse, in mieç al fen. Ada, tant par cambiâ, e veve problemis di digjestion.
Dut tun moment, i veve cjapât une sen di cagâ di chês potentis. Dal rest, nol podeve jessi diferent, dopo chê mangjade di ciespis che e veve fate la dì prime cun Onda e Renato, robantlis dal teren di Marceline.
I frutins si domandavin ce fâ cun Ada, che no varès rivât nancje a smontâ jù pe scjale… le varès fate jù pai sghirets!
«Svelte Ada, cor sù chê bale di fen e bute il cûl fûr dal barcon!»
Intant Ondina e jere bielzà saltade su la cove e e tirave Ada pai braçs par judâle a montâ sù; Renato al spesseave a sburtâle. Lui le tignive pes mans e jê, sbassâts di corse i bregons, come covaçade cul cûl di fûr a sbalç, le veve molade dute. Inutil contâ trop che Ondina e rideve: robiis di pleâsi in doi.
Nissun dai trê però si jere visât di un fat. Ta chel precîs moment che de sufite la smierdade e colave jù sul pedrât, barbe Tite, jevât de polse dal daspò misdì, al vierzeve i scûrs de sô cjamare, al plan disot.
Une rie di risiis, che sbarlufît si è dismot fin il plevan: la buiace di Ada e veve centrât in plen la barete di barbe Tite. E ta chel moment sì che i trê canais e àn scugnût cori jù pe scjale… e pardabon scjampâ il plui lontan pussibil!

di***
#****

 

2 coments On CorseCurteMai#19 – Lâ di cuarp intune filande

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît