CorseCurteAvrîl#24 – Tic tac, la bestie

#24 – Tic tac, la bestie

La ploie bondante e colave indurante e si messedave cu la tiere de strade par mudâ intun pantan, e al jere complicât rivâ a passâ. Jê e veve sintût dolôrs fuarts dut il dì, ma inte gnot di chel 26 di Avrîl si jerin intensificâts. La bestie e cirive di puartai vie alc cun ogni tic tac dal orloi, cun ogni contrazion la bestie e faseve in mût che il dolôr al fos plui intens. E jere lade dôs o trê voltis tal ospedâl, ma nol jere il moment, al mancjave ancjemò timp. Si platave invisibile intes ombrenis, si sglonfave e si contraeve a ogni secont, minût e ore, pronte par atacâ, si alimentave di moments legris e moments di avilizion; e puartave vie cun sè ogni Invier, Vierte, Sierade, Istât. I moments biei si svaporavin daurman, la bestie, tant che un ors grant, si imparonave di lôr intun suspîr, e cun cetante intensitât che si slargjavin chei minûts cuant che al jere alc di dolorôs: l’orloi al someave fer e ogni tic tac al jere tant che cjalâ une copasse a mangjà une fuee, tant che il pegri moviment di un arbul, dut al jere plui lunc.
I berlis si sintivin a traviers dal coridôr lunc e frêt, la ostetriche i diseve cun enfasi di sburtâ, ma jê e sintive un dolôr come che la cjar si rompès, chel dolôr al jere cussì intens di no podê calcolâ, e subit si sintî un piçul a vaî e je e sintive une ligrie, e sintive une maravee par chê biele frute: e jere la robe plui straordenarie che e fos vignude in chest mont par mudâ la sô vite. Une gnove vite, une gnove oportunitât e la bestie e restave di segnâl. Il cronometri al scomençave di zero e dut al tornave al principi.
La frute, vivarose e biele, e cressè e cuant che e deventà grande e profità di ogni oportunitât par domâ la bestie, tant che al fos stât un cjaval sbrenât. Simpri e lotave par lassâ la sô olme, e par chest e sintive un grant pês su la sô schene ma e gjoldeve ogni moment, e vivè une vite plene e, cognossint la bestie, nancje il timp al rivà a pleâle.

di Cecilia Liva (La Sforadie)
#1255

1 comment