CorseCurteAvrîl#01 – Il cidin ch’al tache

#1 – Il cidin ch’al tache

E cjaminave strissinant i pîts come se a vessin pesât un cuintâl.
La sdrondenade le veve dismote, che il sium al jere cetant biel: un prât grandonon, une gleseute che si impareve fra i fros di jerbe e lis rosutis. Une scampanotade che no finive mai. Scomençade biel planchin, plene di gjonde, e veve cambiât musiche di bot.
Vierts i voi al jere ancjemò scûr. Un scûr sotsore. Dal mûr a colavin cricums e il barcon al veve i veris rots, sbregâts come par magjie. Une magjie nere, scure come in bocje.
Si jere spaventade, sì, ma di chei spavents che ti rosein, che ti mostrin une strade a sens unic, che no si torne indaûr.
Denant di cjase al jere di dut. Tocs di gorne, blecs di scûrs, rudinaçs di modon e di ciment. La citât e someave disfate in tancj fruçons che nissune cole e varès podût tornâ a meti adun. Fintremai che no jere rivade sul flum no veve induvinât la veretât. Lis ocjis no jerin plui. I uciei no cjantavin. Ator ator dome cidin, une calme tacadice come il troi dal cai.
Daspò a vevin tacât a saltâ fûr ancje chei altris. Un a la volte, cidins e stralunîts, come marionetis. Inte muse chel stes spavent che e veve intor jê. Si jerin cjatâts dilunc de aghe, ducj a cjalâ par aiar. E alore a vevin capît ancje lôr. Intun cîl che al someave piturât di blu, la ombrene grise di velivui e stave mangjant sù dut. Fers, il cidin al jere deventât di piere. Di un colp un rumôr al veve fat tremâ la tiere e denant di lôr une rie lungje lungje di cjararmâts, i soldâts sul predelin cul kalashnikov pontât. Si jerin zirâts e ancje daûr une rie di camionetis. In tancj a jerin sbrocâts a vaî. Cualchidun al veve berghelât di strice.
Bestiis, a jerin tornadis lis bestiis. No nemâi come lis ocjis e i masurins, o ancje lis pantianis intai camarins e intai gjalinârs. Nol contave che ‘nt fossin vignûts a sdrumis vie pai secui, no si podeve fâ il sorevuès. Ancje se a vevin dôs gjambis come i uciei, a someavin plui al lôf. E come il lôf non saressin ladis vie a mans vueidis.

di Silva Ganzitti (Copasse Blu)
#1232