Lets in Ostarie: Le frute che e dave i nons…

Le frute che e dave i nons…

Marie Fanin

Basandiele, 2011

CE LIBRI ISAL?

Un librut di 62 paginis, miezis par furlan e miezis cu la traduzion par talian, dât fûr cu la colaborazion de associazion Ad Undecimum di S. Zorz dal Noiâr. Al conte une flabe par fruts, intal mût che e sa contâlis Marie.

MA CE ISAL DENTRI, DI PRECÎS?

Une flabe inricjide dai dissens di Maria Grazia Cicuto, che a compagnin la storie, des voltis, piçui, altris voltis grancj di iemplâ dute la pagine. Ilustrazions vivarosis e coloradis che a son in stât di rindi ben lis emozions che a puedin nassi intun frut devant de magjie che si displee devant di lui, intal scoltâ une conte. Che a son, pôc su pôc jù, chês stessis imagins che ognidun di nô al à platadis intai siei ricuarts.

MA CUI ISE LA AUTORE?

Marie Fanin, di S. Zorz. In plui che poetesse e je usade e une vore brave a meti adun di chestis contutis e a rapresentâlis. Plui che leile i vûl sintude e viodude a contâ. Si môf, e rît, e cjante, e gafe la atenzion dal uditori. Pai grancj une fieste di moviment e di peraule. Pai frutins, po, si pues dome inmaginâ ce sorte di esperience

A CUI I PUEDIAL PLASÊ?

A chei che non vuelin dismenteâsi di cuant che a son stâts fruts; ai gjenitôrs che a àn voie di contâ ai lôr frutins flabis gnovis che no sedin simpri chês de tradizion; a cui che al sa preseâ la fantasie; a cui che i plâs la lenghe furlane.

E SE O AI VOIE DI CJOILU?

Provâ a domandâ a la associazion Ad Undecimum info@adundecimum.it. O ben a designgraf@tin.it. O ben diretementri a la autore. Nol è specificât il presi di cuviertine. O pûr, par leilu, in cualchi biblioteche.