CorseCurteMarç#16 – La suaze

#16 – La suaze

— Cumò nin vie, mame! O scugnìn scjampâ!
Ma la femine no si moveve.
Nancje une peraule e veve sunsurât. Dome il respîr si jere fat plui svelt, tant che si podeve intivâlu. Un moviment flevar da schene, segn ancje dal baticûr.
E stave li. Sentade su la sô cjadree, cu la voglade fisse su la suaze tacade intal mûr. Un cuadri consumât picjât a malistent suntun claut che nol molave, a dispiet dal tremaç che pôc prime al veve petât la cjase interie.
Ancje lui segn di resistence.
E veve provât, sô fie, a tirâle par un braç, ma al jere stât dibant. Anzit. La zovine e veve ricevût di contrast une fuarce strane, gnervose, di sigure mai spietade di bande de femine, cussì sclagne e sclendare.
— Ti prei, mame, no vin plui tant timp!
Nuie.
Il veri sbecât e sgriât dal timp, cun dut che al veve une crevadure dulinvie, al cirive di parâ la fotografie che e jere sot, metude par sclavueç su la sacume di len. Il ritrat al mostrave jê e il so om, il dì che si jerin maridâts. I vistîts di gale, la taule parecjade pe ocasion, un vâs di sclopons poiât in bande.
Une zornade di gjonde.
Par plui di cincuante agns a jerin stâts dongje e dopo che l’om al jere muart, a restave dome chel ricuart a memoreâ la lôr union, il lôr amôr, cumò a stent rimpinât su la parêt slisse.
E ogni an la femine e voleve vê iniment chel inovâl, propit la stesse dì des lôr gnocis.
Une rie lizere si jere piturade su la bocje de femine. Come un rai di soreli che al forope i nûi dopo un rogan, cussì che sclese di ridade e veve mot dute la muse, fasint cambiâ l’estri e la espression de viele.
Il ricuart si jere fat contentece, ricreant il leam insumiât cul so om. E cumò al sarès stât par simpri.
Lis sirenis e vevin vuicât par visâ la int di platâsi tal soterani, prin che la ande feroce dai bombardaments a tornàs a sdrumâ il paîs.
Ma jê no straviave i voi da suaze. No. No ju varès mai gjavâts.
E jere la sô fieste.

di Massim Furlan (Sbreghebalon)
#1220

1 comments On CorseCurteMarç#16 – La suaze

Leave a reply:

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît