#15 – Conte pal Judiç
A son dome lôr trê in cheste gnot: Domenie, sô fie Luzie, e Mercurie, la gnove rivade. Mercurie no somee straneade come altris prin di jê. Anzit, e je sigure e pronte a cualsisei prove in chest rituâl che pocjis personis a cognossin.
Il bosc dongje Nearêt al é il sucrit plui sigûr par mudâ il cuarp e l’anime di Mercurie e donâju al Grant Cjavron.
Luzie, zirant suntune gjambe come une balerine celestiâl, lassant il vistît blanc e trasparent slargjâsi fintremai a svolâ vie, e devente piçule piçule, cuntun music di fâ invidie ae dee egjizie Bastet par elegance e forme. Lis liniis di cheste zovine sclagne sclagne a son cumò il dissen dal cuarp perfet di une gjate.
Domenie no le cjale, e je concentrade dome sul rît; un sô piçul gjest e inficje un dolôr di sconvolziment a Mercurie che e cole par tiere cence flât, dut scûr tai siei voi. I volin cuatri o cinc minûts prin che si torni a cjapâ. Mercurie si tocje la spale ch’e bruse, e sposte i voi, che cumò a rivin a viodi alc, e cuntun riduç e leche chê feride, marche dal Diaul.
La gjate e sgnaule butant fûr un ciuleç di sturnî, e va dongje di Mercurie e i cjarece la gjambe. Intant Domenie le busse su la bocje cu la passion di un amant. E no le mole, le grampe simpri plui strente, puartantle a balâ cu lis pontis dai pîts su la jerbe frescje e bagnade di Avrîl. Daspò i dêts si sfancjin dal laç de gravitât e lis dôs feminis a van dilunc a balâ par aiar intune danze cence regulis, parcé che cheste gnot e je gnot di fieste e no si va daûr a nissun insegnament.
Dome dopo oris di matetât, crotis e scanadis e sudadis e sporcjis di tiere, a son prontis par mudâsi ancje lôr in gjatis e lâ, cul jutori di un fîl di lûs de aurore, te cjamare di Cristoful Sparamani, par striâlu e fâi pierdi il sintiment.
Ai 13 di Avrîl dal 1647. Dopo setemanis di agonie, cui vues des mans rots, segn dai “sibilli”, conis di len ficjâts framieç i dêts, Domenie e Luzie a vegnin condanadis a muart. La dì dopo decapitadis in place, come monitori pe puare int dal paîs.
di Alessandro (Real Cocâl)
1219
