CorseCurteMarç#14 – Fieste di Primevere

#13 – Fieste di Primevere

Sint chês cjampanis dongje lontanis
trop che piturin poesie dal cîl,
cul svol des sisilis tiessin contentis
le vite che torne a slargjâ il mantîl

Di là sù il soreli
cun gracie di pari,
consegne par man
primevere al lunari

Dulintor le nature
cjame colôr,
ogni plante dal butul
passe a la flôr

E il so nulî bon
par dut a si sente,
e content a nus conte
de vierte stagjon

E dentri chê conte
che le anime incjante,
il cûr si trindule
sul timp che si implante

Trop biele chê fieste
di vite a da fûr
ator di ogni bande e cjante e sune
le orchestre divine di nestri Signôr

di Luciano Marinig (Potonzio)
#1218

1 comment