CorseCurteMarç#09 – Regâl di gnocis

#09 – Regâl di gnocis

Ce bielissime fieste!
Par me, antropolic e ricercjadôr di usancis di societâts antighis, al podarès sei il pont plui alt de mê cariere. Jessi presint e testemoneâ di persone il sposalizi di doi zovins in cheste tribù dal Kenya plui spierdût e inesplorât e je une robe che nissun al veve mai fat prime.
Il pinsîr al va a colp a un gno futuribil articul publicât su dutis lis rivistis plui preseadis dal mont. E dopo conferencis in Americhe, intervistis, libris. I sfuarçs di une vite ripaiâts.
Cjalâ dal vîf rituâi di fieste inmaneâts centenârs di agns in daûr, cualchidun al podarès ancje olsâ a dî milenis.
Ve il nuviç. Si presente ai parincj de frute e al ven maltratât, sburtât e patafât. Par strani, dutcâs il significât al è peât al fat che lui al è chel che al puartarà vie la frute da sô famee. E difat il zovin nol rebeche e nol reagjìs in nissune maniere.
De sô casope e ven fûr la nuvice lant incuintri a lis feminis de vile. E ven lavade. Dal sigûr un rituâl di purificazion. Daspò la frute e ven distirade e i fasin un tatuaç te panze. Cert che si trate di un rituâl di fertilitât par podê vê une lungje dissendence.
E incredibil! I oms da famee dal nuviç a puartin tal mieç de cort un taur bocognon, simbul di ricjece. Lu puartin dentri de casope de nuvice e in pôc timp a vegnin fûr. Dute la int si da dongje e si met a cercli ator dal taur. Al jentre in sene, mi inacuarç, chel che al sta dant i timps a dute le cerimonie. Une sorte di sacerdot. Al à in man un curtissat cul mani in avori lavorât. Cuntun colp sec al impire il taur. I fantats a vegnin segnâts cul sanc.
A son fameis impuartantonis. Lis fiestis di gnoce cussì a metin fin a conflits e vueris jenfri clans rivâi. Stant la tante int e la puartade dai rituâi, i soi devant di un event storic. Cun grande probabilitât e je la fin di une faide durade agnorums. Un event epocâl.
Di colp ducj a tasin. Ducj si voltin, Mi cjalin. Il cerimonîr al nete il curtis. Al ven da mê bande.
O ai un brut presentiment…

di Sporting Brugnul
#1213

1 coments On CorseCurteMarç#09 – Regâl di gnocis

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît