CorseCurteFevrâr#24 – Il macet di flôrs

#24 – Il macet di flôrs

Tornât de Americhe o vevi cjapât possès de vecje cjase dai miei. Le vevi comedade par la miôr, juste par vivi almancul cualchi periodi dal an.
Une buinore, intant che o russavi il pareman di fier, cirint di parâ vie il rusin, insom dal bearç o vevi olmât une frutate.
Platade tal vert smavit dal boscam, cun moviments delicâts e lizêrs e meteve adun un macet di flôrs. A dî la veretât, e dave dongje lis rosis pescjantlis dal nuie, stant che la jerbe dal prât e jere aromai ridote a un sterp sec e incandît.
No mi pareve di cognossile, ma istès la zovine mi stiçave alc. Strente intun gjilè neri e fruiât, i cjavei ros ingropâts intune strece, il grumâl a rosis. Une bielece flevare.
Di un trat, mi jeri inacuart che ancje jê mi smicjave, tant di fâmi intivâ chê voglade come un invît.
Juste il timp di voltâmi par poiâ l’imprest sul taulin e la frutate si jere sfantade.
L’indoman mi capitave il plevan a benedî la cjase. Mi jere vignût naturâl contâi il fat.
— Mi pâr grande che tu vedis viodût une frutate. Tal circondari no mi impensi che a sedin. Ma de descrizion a podarès someâ ae puare Miriam, che si è inneade intal flum cetancj agns indaûr. Ma chê pûr trop…
— Sì, sì, siôr plevan. Al à reson. Cuissà ce che o ai viodût!
Ma o sintivi che la cuistion no jere ancjemò discrosade.
Cussì tal dopomisdì o jeri lât tal cimitieri e mi jere bastât pôc par cjatâ la lapide di Miriam. Mi veve fat dûl. Consumade, stuarte, ruvinade dal timp e des jerbatis che e menavin ator dal marmul, slacât e sbecât.
No sai ce che mi à sburtât, ma cun fote o vevi scomençât a sbregâ vie urtiis, baraçs e sterps. Mi domandavi cemût che al fos pussibil che nissun si sedi fermât a regolâ chel toc di piere. Tirât vie il grues, mi jeri inacuart che un macet di flôrs vivarôs e colorâts al spontave dal plan sporc e sgriât da lapide.
Lu cognossevi chel macet.
Di chê volte la frutate no le ai viodude plui. Ma cuant che o voi tal cimitieri par i miei, o pensi jo ae lapide di Miriam. E je ancjemò un pôc rote, ma il macet di flôrs al è simpri plui biel.

di Massim Furlan (Sbreghebalon)
#1199

2 comments