CorseCurteFevrâr#19 – La flôr de bataie

#19 – La flôr de bataie

Udin, Otubar dal 1383.

O cjapi un moment par cjalâmi ator e valutâ la situazion.
La androne e je strente. Masse strente par disfodrâ la spade e menâ colps cence intrigâsi. Un disavantaç par me, e un vantâç par chel smafar ca denant di me, che al à za la man pronte dongje de sô daghe.
O strenç il fodri de spade, che par solit o discjani e o ten te man çampe biel che o cjamini par strade. Mi ispire sigurece plui che no tignîle peade cu la cengle tal ombul.
Brute, brutone situazion. Une vorone intrigose. Ancjemò un pas, e chel birbant al sarà avonde dongje par rivâ a cjapâmi cuntune scurtissade, se al vûl.
No mi môf e o resti in spiete, pront a dut.
Il zovin mi cjale te muse. I siei voi mi lassin capî che, sot di chê mafie, e je ancje tante pôre. O ai di pensâ besclet ce fâ.
«Fermiti» i dîs cun vôs calme, ma salde. «Tu sâs cui che o soi jo. No sta fâ monadis, o acà va a finîle mâl.»
Il zovin al cencene e mi cjale ben. Contrari di lui, jo no pant nissune esitazion. Al sbasse il cjâf e al cjale par tiere, e al reste cidin par cualchi moment.
Sul inprin, al somee scuasi metile vie.
Ma no. Intun marilamp, chel sfondron al tire sù la muse dute ruane e cui voi disledrosâts de ruze, mi gafe cu la man çampe pal dacuel, e cu la drete al tire fûr la daghe par copâmi.
E je cuistion di un moment.
Biel che lui al à la sô daghe parecjade par colpîmi, jo o cjapi di buride il fodri de mê spade ancje cu la man drete e, fasint un pas indaûr, cuntun unic moviment lu alci viers diestre di mût di liberâmi de prese de sô man çampe dantiji un colp cul pumul de spade, e in chel i impiri la ponte dal fodri drete intal voli.
Il zovin si bute par tiere tignintsi la muse tes mans, sbielant e vuicant tant che une bestie disgosade. Al vai e al blesteme, ma ni lagrimis ni sants i tornaràn mai chel voli.
«Tenti fortunât» i dîs jo, prin di lâ vie. «No son tancj chei che a podin svantâsi di vê dât cuintri a Flôr dai Libars di Premariâs, e di vê puartade fûr la piel.»

di Barba Pisul Stentadizza
#1194

1 coments On CorseCurteFevrâr#19 – La flôr de bataie

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît