CorseCurteFevrâr#18 – Dutis lis rosis ch’a mi regalin

#18 – Dutis lis rosis ch’a mi regalin

Lis rosis a son la mê passion. Lu son di simpri, di cuant che di frute mi sentavi su la jerbe verde dal prât dongje de glesie, puest ch’al faseve sintî sigure mê mari ch’a mi lassave li par une mieze ore. Cumò lu sai ch’a restave a cjalâmi de lobie di chei dal Muini, intant ch’a cjacarave cun Adeline. Ma di piçule par me chei moments a volevin disi fidance, pâs e libertât.
No passavi chei minûts a cori come lis frutis de mê etât, ma o restavi sentade, ferme, a contâ i tips di rosis che o rivavi a viodi.
Cussì cumò mi plâs che la int che i vuei ben mi puarti flôrs tes ricorencis o pûr a sorprese.
Il gno om al sa che ce che o ai miôr a son lis ortensiis, e lui mi ‘ndi puarte di ducj i colôrs: cheste e je la carateristiche che plui mi colpìs. Ma forsit a son lis mês preferidis parcè che mi cjapavi cure di lôr fûr de cjasute che jo e lui o vevin a Mueç, e che nus faseve di base par tantis cjaminadis.
A rindimi contente, di chê gjonde ch’a ti fâs ridi a bocje spalancade, a son lis rosutis ch’a mi puartin lis gneçutis, ch’a rivin corint chi di me vosant, e mê brût i cor simpri daûr disint: «No si pâr bon!»
Arianna e Agnese, cussì si clamin, mi regalin propit chei flôrs che o fissavi di frutine: margaritis, pestelacs, violis, dut ce ch’a cjatin sui prâts prime di rivâ chi di me.
Serenele, la mê miôr amie, invezit, no fâs câs a lis rosis ch’a mi compre, no si intint di plantis: mi jemple di garofui, ciclamins, gjenzianis ch’a mi dîs: «Li ai cjoltis vignint jù di Claut, ta chê buteghe ch’a ti plâs a ti.»
Jê, dome lis gjenzianis lis sa cognossi, chês altris par jê… une e vâl chê altre. Propit chest mi comôf, l’at, il volê fâmi contente cence scugnî sintîsi obleade a cirî il parcé di chel at.
Ma nissune plante e je impuartante come lis daliis ch’a mi puartin lis mês dôs fiis adun, che a àn finalmentri fat la pâs dopo trente agns di musis lungjis e pocjis peraulis. Chês daliis a son lis solis che o rivi a sintî il profum, chi, doi metris sot tiere, profum di fidance, pâs e libertât.

di Alessandro Valoppi (Real Cocâl)
#1193