CorseCurte – Classifiche di Fevrâr

E cumò sì che lis robis si fasin interessantis! Cualis? Ma lis classifichis de Corse Curte! Sì… sì… lu savin che voaltris concorint o vês fruiât la tastiere par viodi cuant che e saltave fûr la classifiche des contis. Ma ancje chê dal FantaCorseCurte e scomence a viodi cui che al è denant.

Ma anìn par ordin. Come che o savês nus plâs fâ cualchi considerazion gjenerâl su lis robis, par fâ un pont de situazion de nestre iniziative e judâ ancje i concorints intal lôr percors creatîf.

La prime considerazion e je che o sin contents, sedi dal numar des contis rivadis, sedi de cualitât, che si è confermade buine e insome… la nestre Ostarie si sta insiorant di bielis contis.

La seconde considerazion le fasìn su lis votazions, che a son stadis une vore in linie, ancje plui dal mês passât, pe jurie tecniche, stant che lis primis contis inte classifiche di Fevrâr a son plasudis, ben o mâl, a ducj i components dal tiro Franc-Pup-Serafin. E intal disi chest si pues marcâ come che lis scuadris rivadis un pôc plui indaûr, par solit, al è parcè che e àn metût in zûc alc di diferent di une conte (poesiis o riflessions) dulà che, ben o savês, la gare e je une sfide fra contis.

Altre considerazion le podin fâ sui coments e sul FantaCorseCurte. Tancj che a vevin let lis contis il mês passât a son tornâts a fâlu ancje chest e a àn votât. E al è biel viodi, ancje par nô, une alte partecipazion di letôrs. E ta chest al è une vore biel viodi che tancj zuiadôrs a àn let e votât, un segn di rispiet pai aversaris e ancje di preseament par noaltris (soredut l’Ostîr) che o metìn une vore di timp a stai daûr a dut e viodi partecipazion nus ripaie.

Ma vonde cjacaris. Ve chi la classifiche dal Mês di Fevrâr, buine pes scuadris e pai scometidôrs!

Chest mês us mostrìn dut, sedi i caratars, sedi bonus e penalitâts, sedi la votazione ricevude des dôs zuriis. E su la fonde di chestis votazions comentìn la classifiche di Fevrâr.

Al à vinçût la zornade di campionât di Fevrâr, e cun merit, il Sporting Brugnul che al à metût dacuardi in pratiche dute la jurie cu la sô conte La Corse, che us invidin a lei, parcè che al è probabil che il sô sucès e la maniere di intindîle a sedin peâts une vore ai acjadiments dal mont di vuê. E in efiets la conte e je plasude ancje ae zurie dal Public. E je la prime grande sorprese de zornade!

Al secont puest la seconde grande sorprese di Fevrâr: Motoguzzi. Dopo une prestazion a mieze classifiche a Zenâr Motoguzzi e à metût la marce alte e nus à regalât un toc dramatic che al è plasût une vore al public, tant di regalâi – insiemi cuntun di bonus –  i ponts che i coventavin par sanâ lis penalitâts. La coriere e je une altre conte che e merete sei lete.

Tierç in classifiche o vin il toc plui tecnic e ben gjestît di dut il trop. Une conte che e covente lete almancul un pâr di voltis par preseâ inmplen la maluserie e il vivi pleât de vite che e ten dentri. Si conferme la vincidore di Zenâr, ven a stâi la scuadre dal Cjicechepicjedispicjelacite. Il toc nus fevele Di perlis e di ranuncui.

Ma bisugne dî che la scuadre vincidore di Zenâr a pari merit e à tignût bot, pierdint dome un pont cuntun cuart puest di zornade che al conferme che chestis dôs a parin jessi lis scuadris di bati par deventâ campions di Invier. Leieit il toc dal Reâl Cocâl, che nus fevele di Dutis lis rosis ch’a mi regalin.

Subit daûr al è un trop di inseguidôrs une vore ferbints, e si cjate confermis e sorpresis. Il Barbe Pisul Stentadizza, il Borussia Dordul, Passarute, Sbreghebalon e l’Atletic Gjatui a àn poiât jù ducj une prestazion di marcâ, pôc lontan dai prins.

E une citazion e va fate par il Gjaline Padoane, scuadre che intes ultimis oris des votazions dal public e je passade di 0 a 7 votazions, e che e varès vinçût il premi dal public, ma pûr trop doi de jurie a àn anulât la votazion pandint il non dal concorint. Si marche in ogni câs la buine prestazion dal toc La liende dal sbusenêf, inte jurie dal Public che le à preseade une vore.

[Us visìn, za che o sin, che cheste no je une competizion ma dome un zûc, e che il pandi lis contis in maniere anonime al jude a rindilu plui biel :)]

E su la fonde di cheste classifiche, ce isal sucedût tal FantaCorseCurte? Ve chi l’inzornament…

Come che o podês viodi, o vin cinc letôrs une vore fuarts e il prin, in teste ae classifiche, nol è li par câs. Lussian al à letis DUTIS lis contis de Osterie e al è di agnorums il nestri Top Comentadôr. Dute cheste esperience, si viôt ben, lu à puartât a scometi simpri su la conte che dopo si è rivelade jenfri lis miôr dal trop.

Ma al à di sta atent: Cecilia Liva, Noemi Salva, Rosute Pelote, Nene e il Volketitrai-Liga a àn bon voli e son li a un tîr di clap… Starin a viodi!

E cumò che us vin dâts i risultâts di Fevrâr o podìn pandi la Classifiche Gjenerâl che nus spie za cui che si zuie il titul di Campion di Invier.

Vele chi!

Insome… Trê scuadris a son denant e a metìn une buine ipoteche su la stagjon, ma al è un cuartet che al à buinis possibilitâts di ficjâsi dentre o adiriture freâlis, soredut se al ves di capitâ dentri te competizion cualchi altri partecipant (alçânt i ponts) o se cualchi top team al ves di stecjâ la zornade di campionât. Insome… il mês di Març al è in plen davuelziment.

Come simpri, us invidin a jentrâ in corse, sedi come Corsecurtârs, sedi come FantaCorseCurtârs… Il biel al è partecipâ!

1 comment