Cence savê ne parcè, ne par co…

– Noi continueremo, con le nostre sanzioni! – Chest al veve dit un dai rapresentants politics ch’a nus guvierne, ven a stâi che i dispiets a saressin continuâts, di dutis lis bandis… cussì la vuere e je sclopade. Sperìn che tal timp a fasin sclopâ ancje la pâs, come il solit, dut par ledrôs. Par sigûr un pocje di colpe le varin ducj, fat al stâ che cumò no sin ta un moment biel!
Chel siorut ch’al comande chel toc di tiere plui adalt di no te cjarte geografiche, nol è di cumò ch’al cîr, come tancj altris, di fâ i siei fats, pussibil che nissun di chei ch’a nus comandin nol vedi nasât ce intenzions ch’al clucive jenfri vie? Mi pâr che è àn tignût i voi ne vore in sfese! Tal mieç dut câs e reste la puare int, ch’o saressin nô.
Mi ven tal cjâf une robe, capitade za fa di agnoruns, cuant che dutis lis fameis tal curtîl a vevin il pulinâr cun gjalinis, ocjis, razis, ch’a jemplavin lis covis di ûs, un ben ch’al coventave par mangjâ e po ancje par comprâ la robe. Al fo propit par cause di une raze, che e veve cjapât la mende di lâ a pojâ l’ûf ta un pulinâr dongje, che e scolpâ une baruferie. Le robe a capitave dispès, cussì la parone dal pulinâr le tignì di voli, prime di dut e cjatâ culche bûs te palade di confin de cjase tacade de sô, ma la besteute no si fermave lì e e lave tal pulinâr di chê altre cjase di confin ven a stâi, te seconde. Cussì e domandâ ae parone di chê se e podeve taponâ i bûs che la razute e faseve te palade in mût di discjoile di chel fat. La cofinante direte e someave ch’a ves cjapât a cûr la robe, e taponave i bûs de palade di chê altre cjase, e scorsave vie la razute, ma nuie di fâ. Il plui da lis voltis l’ûf al restave tes mans che nol veve di restâ. La parone de raze e scomençà a protestâ par chest e e tacà a bruntulâ ancje cu la sô confinante par vie che i someave che no tignìs avonde di voli il fat, o par cualchi suspiet. Fin che une dì la raze si presentà tal so pulinâr cuntune ale splumade e une çate che sanganave. Nissun al vignì a savê ce ch’al jere sucedût, ma cui ch’a fo cjapade plui in piche pal fat, e fo le femine ch’a stave te cjase di mieç e je no capive il parcè e e diseve –Ma viôt, o soi lade di mieç dome par che i stoi tal miec! Cussì nus tocjarà a noaltris, rivuart ae vuere, une detule viere furlane e profete:- Cençe savê ne parcè, ne par co… o larìn di mieç ancje nô!

di Marisa Gregoris
#1201