CorseCurteFevrâr#10 – I tulipans di agne Gjisele

#10 – I tulipans di agne Gjisele

Mê agne Gjisele e veve un biel zardinut fûr da sô cjase insom dal paîs, dopo la muart di gno barbe Gjovanin e jere restade di bessole cul so cjanut che si clamave Dik. Al jere un bastardut  blanc e neri cul biel pêl lunc e morbit, al jere simpri tal mieç des gjambis di Gjisele che i cjacarave come se e ves vût un frut. Tal zardin, mê agne e veve metût rosis di ogni sorte: garofolârs, margaritis, primulis, violis, pivocs. Ogni stagjon e veve la sô sfloridure, ancje di Invier cuant che l’arbul di calicantuç al spandeve il so profum. Sô gnece Lussiute e veve partadis dal Olande un biel scartòs plen di cevolis di tulipans e je no viodeve la ore di traplantâju, e veve pensât di fâ une rie dilunc la stradele che e lave da cusine fin sul porton. E viodeve za in Vierte dute chê stradele plene di colôrs, cui sa ce biel viodi!
Alore une matine e decît di fâ il lavôr e intant che e preparave la tiere e spiegave a Dik:
«Viodistu mo, o ai sgjavât la rie drete, cumò o met sot un pôc di ledan e dopo in ogni buse o met dentri une cevole.»
Il cjan al cjalave e al menave la code come se al ves capît dut.
Gjisele alore e va a cjoli une cjadreute par sentâsi e no fa masse fature par sbassâsi e po e scomence a gjavâ dal scartòs une par une lis cevolis e soterâlis par ben. Cu la man e cjalcjave la tiere par che la plante e ves bon stâ.
A la fin, rivade insom da stradute si poie sul porton, si lamentave un poc di mâl tal zenoli che e veve operât agns fa e alore e veve di bisugne di un aiût par tirâsi su. «E ce vûstu Dik la vecjaie e je cussì e bisugne sopuartâsi.»
Bon, alore cuant che e jere ben inpins si zire par gjoldi il so cjâf di opare e viôt… dutis lis cevolis poiadis sul muret dilunc la stradele e Dik che al menave la code content che mai dal so lavôr!

di Nene Furlane
#1185

1 coments On CorseCurteFevrâr#10 – I tulipans di agne Gjisele

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît