CorseCurteFevrâr#08 – Bocje ridinte

#08 – Bocje ridinte

In passât tal gno paîs e jere usance che la cuinte elementâr le cjapàs il Mestri Cànon (ma nô lu clamavin Mestri Canòn).
Nol jere un trist om, ma grant e grues di fâ pôre e a nô frutinis no nus plaseve, parcè che cuant che si inrabiave, e al sucedeve avonde dispès cun chê sdrume di canaiots che al veve, la sô vôs e tonave di fâ tramâ i veris e po… al puçave di tabac.
Inta chel an, nus sarès tocjât a nô e dute la Istât il pinsîr nus veve ruvinât i zûcs.
Il prin di Otubar, cul grumalut pene stirât, il golet cjandit ben inamidât e un biel floc colôr di rose, si sin presentadis a scuele tant che vitimis sacrificâls, ma a spietânus su la puarte nol jere il Mestri Canòn, lât in pension, ma une mestrute une vore ninine e cu la bocje ridinte, che e veve cjapât il so puest. Cun jê, lis robis a jerin ladis subit ben: e jere di cûr, simpri contente, no alçave mai la vôs e po… e nasave bon di Mughet.
No saltave zornade cence che un frut o une frute no i puartàs un macut di flôrs di cjamp o di fossâl. A jê i faseve une vore plasê e cun gracie lu meteve intun vasut su la catedre e intant, cun lizerece, nus vierzeve il mont des liendis e de botaniche. 
– Chestis – e diseve – a son Margaritutis, chestis Pestelacs…, chestis Violis…, e cussì vie indenant. Une volte i vin domandât cuâl che al jere il so flôr preferît e jê nus à rispuindût: – Chel che nol flapis. Cussì, cuant che e je finide la scuele i lu vin regalât.
Ognun al veve taiât doi pics intun sfuei di cjarte di becjarie e ju veve tacâts un cuintri l’altri suntun stechedincj, cussì che di une bande si leieve il so non e di chê altre la sô peraule biele pe mestre. Po o vevin impirât i pics ator di une balute di zes di prese. Un spêt di len piturât di vert, al veve completât la opere.
Une volte suiât il zes, dut al stave ben adun e chel flôr al someave propit un gjirasol. Tal ricevilu, la Mestre si è ingropade. E je stade la uniche volte che no le vin viodude fâ bocje di ridi.

di Maghe Olstrele (Rosute Pelote)
#1183