Il numar 1089 – Cronachis di Saveri Sengar
di Franco Marchetta
CE LIBRI ISAL?
Al è il libri che al à vinçût il 32sim Premi San Simon, tal 2011, lunc 99 pagjinis (15€).
MA CE ISAL DENTRI, DI PRECÎS?
A spiâ che il numar 1089 dal titul al à a cefâ cun Garibaldi al ven di pensâ che al sedi un libri storic, e invezit no. O almancul, no dome. I doi personaç marchetians, Saveri Sengar e Arcjan Rinalt, il prin in grât di viazâ indaûr tal timp, il secont curiôs di stiçâlu, a son i doi personaçs che a fasin di clâf par vierzi i cantins de storie, ma ben restant intal timp presint, dulà che si met adun une sorte di crime story che si disvilupe fra Friûr e Tiere d’Albion, cuntune vore di modernitât.
MA CUI ISAL L’AUTÔR
Franco Marchetta al è autôr ben cognossût, preseât e memoreât, ancje chi in Ostarie, Al à vinçût plui voltis il Premi San Simon e altri premis furlans e talians, stant che al à vût scrit in dutis dôs lis lenghis. In bande che autôr di narative, al è stât autôr di saçs e di teatri. Tra lis oparis, di ricuardâ “Madalene” (Premi San Simon, 2002), Gilez, Il sium di chescj furlans in fughe, Il tempo morbido e, simpri cui protagoniscj Saveri e Arcjan, Achì no vin viodude une pavee, libri che al va insiemi cun chest, intal unitari “Cronachis di Saveri Sengar”
A CUI I PUEDIAL PLASÊ?
A chei che a àn voie di scuvierzi cemût che si pues doprâ il furlan e il Friûl par scrivi storiis fûr scuare e che a àn dentri une vore di fantasie. A chei che ur plâs lâ ator pai timps, e meti dongje informazions storichis a une trame vivarose e plene di snait. A chei che a vuelin cognossi un dai autôr furlans di riferiment dal secul XXI.
E SE O AI VOIE DI CJOILU?
Si pues provâ li de Forum, che e jere la cjase editori dai San Simons dai timps, o a cjoilu in rêt. Si cjate inmò intes libreriis ben fornidis di robe furlane e dal sigûr tes bibliotechis.
