Lets in Ostarie: Plaidarts

Plaidarts – Un lunari di vitis comedadis

di Gianluca Franco

CE LIBRI ISAL?
Al è il libri che al à vinçût il 38sim Premi San Simon, lunc 156 pagjinis (10€).

MA CE ISAL DENTRI, DI PRECÎS?
Plaidâ, par furlan, e je une peraule mancul doprade di perorâ, che e à il stes significât. Ta chest libri a son 12 plaidarts, 12 perorazions, une par ogni mês dal an. Dodis contis che a contin di furlans che a àn une brute innomine, che a àn cumbinât alc che la storie no i à perdonât. E si sa che il judizi di cui che al ven dopo al è fat cul cjâf e tal timp dal dopo, si che duncje al sarès biel viodi ce che a àn di dî, sul lôr cont, chescj 12 furlans, par difindisi. E magari rivâ adore a cambiâ un pôc il judizi e butâ une lûs diferente sul voli storic dal letôr.

MA CUI ISAL L’AUTÔR
Gianluca Franco lu podês lei ancje in cheste Ostarie, al è aromai grant client de Osterie e di spes presint aes nestris scorsenadis. Cu lis sôs contis, simpri ben poiadis dificil che al lassi indirent il letôr. In bande dal San Simon al vinçût une vore di altris concors (Vôs de Basse, Zâl par furlan, juste par butâ doi nons)  e dispes i plâs tamesâ la storie e il passât par contâ storiis che a partissin di li. Di Re Ricart a lis mumis di Vençon fintremai a lâ a finîle al fat di Petean. Il so ultin libri, pe tierce volte vincidôr dal San Simon, al è See the sky, about to rain – balade pai timps di ploie. O podês cjatâ lis sôs publicazions sul so sît.

A CUI I PUEDIAL PLASÊ?
A chei che ur plâs lei contis peadis di un fîl logjic e metudis intune cornîs, che in bande dal contâ une storie a contin ancje fats storics, curiositâts de culture furlane, magari misturant narative e sagjistiche. Ur plasarà di sigure a chei che a àn voie di cjatâ un furlan diferent e pôc doprât, cun peraulis antighis o espressions lontanis dal furlan plui moderni. A cui che al à voie di savê alc, fra di altris, sul Vanzeli di San Marc e il Patriarcje Nicolau, sul Ors di Pani, su Tristan Savorgnan, su Laurinç Luis Linussio, su la langobarde Romilde, femine di Gjisulf, su ’Sef dai Sus. Ur plasarà ancje a chei che ur plasin i romançs storics.

E SE O AI VOIE DI CJOILU?
Facil. Al è publicât de Societât Filologjiche Furlane e lu si cjate in sede, in vie Manin, o sul sît cence fastidis.