La Conte dal Mês… di Setembar!

Le vin cumbinade, o nus pâr ancje di vêle cumbinade avonde ben, cun dut dai intops che si cjatin simpri cuant che di virtuâl a si vûl deventâ di cjar e vues… come che o savês ben che nus plâs fâ. Si che duncje, nin par ordin, che o savin che us plâs spiâ ancje ce che al sucêt daûr dal bancon, e no dome devant.

L’event al jere dentri dal programe di Art in Cort, prudelât de Filologjiche Furlane che nus meteve a disposizion la cort dentri di Palaç Mantiche, e chest al jere il tierç apontament che nus viodeve coinvolzûts. Cussì, dopo une presince come letôrs inte presentazion di Bisest, dal nestri Ostîr, e ancje intal biel spetacul di Gianluca Franco, che al à metût in cjançon e leturis senichis il sô libri “Silvie te catedrâl di Taragone“, al tocjave propit a nô di Contecurte immaneâ la serade. E noaltris o vin sielte cheste ocasion par dâ une gnove, si che, il teme de serade al è stât… La Conte dal Mês!

L’Ostîr e la Coghe a àn tornât a cjapâ in man la Conte dal Mês di Setembar, che e fevelave di benandants e striis e da lis usancis peadis aes 4 tempora, e a àn zontât tocs di libris innomenâts, come Il formaggio e i vermi di Ginzburg, o Madalene di Marchetta, par misturâ la narative de conte dal mês – lete dal Ostîr – cu la leterature lete dal fidât Berlon, intant che la Coghe-Strie e spiegave al public numerôs di ce che si fevelave.

E cu la colone sonore, gjestide de nestre Sartore doprant blecuts di musiche furlane fuartonone, come i Francis and the Phantoms dal nestri fidât Famei o i scalembris Autostoppisti del magico sentiero, o vin metût dongje ancje une senografie di dut rispiet: ûe, fics e altri pomis, cun tant di ramascjis di soròs e fenoli salvadi, che la strie e il benandant a àn doprât par barufâ a inizi serade. E cun di plui, la senografie, si podeve ancje mangjâ ae fin dal spetacul (robe che e je stade fate).

Insome… une super serade! Ancje se, al va contât ancje chel, par une volte che o vevin preparât dut, stampât i copions, rivât a no dismenteâ nuie inte setemane a lunc che i vin lavorât parsore, o vin vût ancje une schirie di sfighis che al jere dome di ridi. Si cjatìn ducj puntuâi une ore prime, ma il diretôr, ancje lui puntualissim, al piert lis clâfs e tocje cirî cualchidun che al vierzi; imbastît il set di premure o scuvierzin che a un microfon al mancje un toc e nus tocje peâlu cul scoç, il Berlon, cun chê di Friuli doc, nol cjate parcament e al met la machine suntun arbul di Place Prim Mai, microfon e cavalet pe direte facebook a parin funzionâ ma dopo o sin cence conession e tocje domandâ un hotspot a une gjate marangule… Insome, al pareve pardabon un scuintri jenfri striis e benandants (e al è miôr no contâ ce che al è sucedût par rivâ a cenâ a Udin, che va che va sin ancjemò a cirîsi pai trois de citât).

Ma cun dut chest, no stin dismenteâsi di pandi la gnove, stant che o vevin dite che e sarès stade une biele sorprese. Ben po… al pâr che Lis Contis dal Mês, il nestri progjet che al è lât indevant par dut il 2020 a fâ il diari dal an passât a fuarce di contis e articui, al deventarà un libri, propit in gracie de poie de SFF, che cumò – cul Diretôr a sintî dal barcon adalt – no pues plui tirâsi indaûr. 🙂

Insome… o sin une vore contents di vê rivât a meti adun un event in presince ancje chest an, e viodarin di fâ in maniere che nol sedi l’unic.