Scoltecurte #2: Dal ridi al vaî

Seconde part de nestre iniziative che us puarte lis contis tes orelis! Aromai lu savês, si clame Scoltecurte e par cumò o vin domandât a chei de nestre Ostarie di sielzi une conte che a àn voie di lei e di leile par ducj. Achì la seconde butade, che o vin clamade Dal ridi al vaî, parcè che si sin inacuarzûts che lis contis sielzudis a jerin, dut câs, trê contis che sì, a sbregavin vie une ridade, plui o mancul piçule, ma come che nus à ben insegnât Pirandel, daûr dal ridi si plate il drame, la maluserie, e dispes al è facil di viiodi. Al baste spostâ un tichinin la tende e si vierç il sipari sui budiei de conte.

E alore vele la prime. Le à sielzude la nestre Massarie, Margarite, e e je une conte de Sartore, che i veve plasude soredut parcè che e jere peade a un fat di atualitât di chê volte. La conte si clame Vueit di rindi e e jere jessude tal Mai dal 2019, cu la imagjin che e veve fat scjas ta chê volte. Po dopo, al somee che e sedi passâts agnorums, il mont al è cambiât, ma nol pâr che al vedi ancjemò cjapât cussience che il probleme ambientâl, ancje se si pues cuasi ridi di dut ce che i pagûrs a doprin come cjase, al è aromai un che al tuche fuarte a la puarte de umanitât e prin o dopo, se no pensin a parâlu vie in cualchi maniere, le sdrumarà.

Seconde conte de pontade e je une conte di Renzo Brollo, une vore viere e che tai prins events de Ostarie o vin dispès doprât par leile in public. E je stade parfin publicade, di cualchi bande, parcè che e veve un mix di ironie e drame che no tu savevis se ridi o vaî, di chê storie. Le à sielzude il nestri Berlon Michêl che al à simpri passion par chestis robis dulà che si rît ma al è pôc ce ridi. Anzit… forsit il titul al podeve jessi ancje Al è pôc ce ridi, ma insome… il sens al è chel. La conte e à un titul-citazion: Passaç a nord ovest di Triest e o vin sielzude une imagjine un pôc fuarte, almancul par l’odôr… nus perdonarês.

Ultime conte e je un piçult premi. Cuant che o vin anunçât la nestre iniziative di Scoltecurte, o vin dite che o varessin sielzût une conte di lei tra chês che a rivavin di li ae fin dal mês, o ce che al è. Ben po, l’Ostîr al à sielzude cheste conte di Laurin Zuan Nardin, parcè che al veve voie di fâsi une ridade e di vê un toc di chei che magari a rindin di plui a la scolte, che a a la leture. Viodêt ancje voaltris ce che us pâr miôr. Achì intant le podês scoltâ. La conte si clame Hyundai, che a dilu par furlan al sune in dute une altre maniere…

Al è dut e… BUINE SCOLTE… CURTE!

2 coments On Scoltecurte #2: Dal ridi al vaî

  • Il fat di atualitât che al à ispirât “Vueit di rindi” nol ere tant peât a tematichis ambientâls ma pluitost ae libertât di opinion e di insegnament. Al ere sucedût a Mai dal 2019 e si tratave dal câs de professore siciliane Rosa Maria Dell’Aria, sospindude dal insegnament par vie che i siei students a vevin preparât un video dulà che il decrêt sigurece di Salvini al ere confrontât cun lis leçs raziâls dal 1938.
    Dute la storie si puès cjatâ ca https://www.ilpost.it/2019/05/17/storia-insegnante-sospesa-palermo-slide-salvini/
    E duncje se i cjâfs dai zovins a vevin di restâ vueits di opinions, cemût si podevial doprâju?
    Dutcâs a dicembar 2020 il judiç dal lavôr al à dât reson ae professore e al à ricognossût che la sospension e jere infondade.

  • La bielece di vê le lenghe oltri che scrite ancje cjacarade, tant di miôr, che cussì si po scuvierzi plui ben il mût di pronununsiâ lis varîs peraulis, e dopo gjoldi cence fâ nie, lis bielis contis che vignaran fûr. Un biel jutori par imparà ben le nestre lenghe. Lussian

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît