Lets in Ostarie: “Si fâs par mût di dî”

SI FÂS PAR MÛT DI DÎ
Al è un vieri libri di Riedo Pup, in cheste edizion, plui facile di cjatâ, dal 1980, ma che al jere stât butât fûr des Grafichis Editoriâls Artistichis Pordenonesis za fa tal 1977, cuntune altre cuvierte. Al à une prefazion di Ottorino Burelli e cualchi dissen tal mieç di Paolo Zanussi. Al à pôc plui di 200 pagjinis e dentri a son 213 fra sprocs/batudis/pensîrs.

CE LIBRI ISAL?
Un libri fât di piçui componiments che a son cualchi volte une batude, cualchi altre une critiche (soredut di nature politiche) e cualchi altre une considerazion sui timps che a corevin e i fats di cronache, sedi taliane, sedi furlane. Si lei une vore a la svelte, stant che di spes i tocs a son fats di dôs o trê riis. Sot e je la traduzion par talian.

MA CE ISAL DENTRI DI PRECÎS?
Critiche politiche e sociâl, soredut. Puppo, simpri in maniere avonde garbade e simpri cun grande ironie, al tamese i fats politichis talians, il rapuart che il Stât talian al à cul Friûl e ancje il Friûl che al à ator, e che al scomence a cambiâ. La plui part dai sprocs a son sì batudis, ma mareosis. Si fevele dispes de coruzion, de DC, des stragjis, de italian dai agns ’70 che e somee vê pardabon pôc di bon. Cumò, plui di cualchi toc al è deventât vieri e al pues someâ scontât, ma a metilu intal sô contest storic, il libri al cjapê un val.ôr che al va plui innà de batude e al devent un spieli de epoche. In sumis, al è bon ancje par une analisi de societât taliane dai timps, viodude cui voi di un furlan critic e atent.

A CUI PUEDIAL PLASÊ?
A cui che al à gust di fâsi cualchi ridade cu la satire politiche e sociâl, a cui che al à voie di cognossi un scritôr che al à doprât la lenghe furlane in maniere curte ma une vore eficaç, a cui che al à gust di cognossi lis lidrîs de leterature curte furlane, che no je dome fate di narative.

DULÂ LU CJATIO?
Dificil. In rêt si cjatin copiis dopradis, ancje se no masse a bon presit. Ma lu si cjate ator pai puescj dai libris vieris e in diviersis bibliotechis, che si puedin sgarfâ midiant di chest sît.

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît