Contecurte a Novembar

Al è partît, par il tierç an di file, il Concors Vôs de Basse, che al è dediât nuiemancul che a lis contis curtis par furlan. Al è facil di partecipâ, nol coste nuie e si puedin vinci ancje bêçs in libris. Ma il discors al è ancje un altri, che al va plui innà di chest. Se o volìn dà un segnâl fuart e un sburt a lis iniziativis che a a metin dongje culture e lenghe furlane, e che a lu fasin doprant la leterature che nus plâs une vore achì in osterie, o varessin di scomençâ propit di chest concors, metût adun pes contis e cuntun sfuarç economic/organizatîf di un pôcs di Comuns. Par chest, secont nô di Contecurte, mai come in chescj timps al è impuartant partecipâ, incressi la vôs (de basse), ancje dome par dî di jessi presincj, di vê a cûr no dome il scrivi contis ma ancje il leilis e lis ativitâts peadis ae culture.

Ven a stâi… Partecipait contecurtârs!!

E propite par marcâ la nestri poie al concors, noaltris di Contecurte o metarin adun un piçul spetacul di contis dentri de serade di presentazion che si davuelzarà a PRISSININS, MARTARS DI SERE, ae vote e mieze. L’event si clame Ce contino te basse. Se o sês di chês bandis e je simpri une buine ocasion par scoltâ a cjantâ la nestre massarie intal due acustic des ConFusione, scoltâ contis, fâ dos cjacaris e bevi alc insieme ae fin de serade.

Al è timp di SUNS EUROPE, il festival des lenghis minoritariis che al cjape dentri soredut la musiche, ma al tire dongje ancje la leteradure e la culture in gjenerâl. Nô de Ostarie o sin dai convints prudeladôrs di cheste iniziative e us invidin a dâ un cuc ai apontaments peâts al festival, che o cjatais tal programe uficiâl. (Se propite no cumbinais pe serade finâl dait un cuc a lis seradis che a vegnin prime, che a son dutis di rive jù).

In cheste suaze, simpri fevelant di leterature, il vuestri ostîr e il nestri contecurtâr Gianluca Franco, joibe 28 aes 6 sot sere li de biblioteche civiche Joppi di Udin, a vignaran coinvolzûts intun dibatit relatîf ai premis leteraris e a lis vôs furlanis che a scrivin. Condutôrs, la nestre coghe, Serena Fogolini e Walter Tomada, plui altris ospits. Us prometin che o cirarin di tignî cjalde la discussion!

Forsit us sarà rivade te orele la vôs che il vuestri fidât ostîr al à vinçût il premi San Simon cuntune (altre) racuelte di contis, Bisest, e in bande di lui, il numar doi de ostarie, il Famei Checo Tam, al è stât segnalât pal so lavôr. Poben, in gracie de poie de UTE dal so Comun, Rafaêl Serafin al vignarà metût sul banc dai imputâts e al “contarà cemût che al conte“. Al varès vût di jessi un incuintri cul autôr, ma al somee che al deventarà un alc di diferent. Se o vês gust di scuvierzi cemût che a son nassudis lis contis dai libris dal ostîr e cemût che al à sielt di scrivilis in chê maniere e no intune altre (E se o vês gust di scoltâ i testemonis che a lein cualchi conte, cuissà, magari inedite) no vês di fâ altri che vignî a Listize, vinars ai 29, li dal bar Aganes in place, aes 21.00. Dutcâs o cjatais chi sot ancje une locandine di chest event.