fbpx

La strie

E viveve di bessole intune cjasute di un plan fûr dal paîs, scuasit in mieç dai cjamps. Si clamave Gjenovefe ma par la int dal paîs e passave par la strie. No faseve mâl a di nissun e e viveve cuntune vore di besteutis che i fasevin compagnie. Cjans, gjats, gjalinis, cunins, e ancje pantianis a ziravin come parons in cjase sô e je ur voleve ben a ducj.
Noaltris fruts, cun la carognetât da la mularie, ogni tant o lavin a fai dispiets dongje cjase e a zigâ: ”Strie, strie, il diaul ti puarte vie!”. Plui voltis je e saltave fûr di cjase zigant: “Lazarons, us fâs vignî il cagot si no la finîs!”. E noaltris o scjampavin, ridint.
Cualchi fantate dal paîs po ogni tant a lave di jê a fâsi butâ lis cjartis, par viodi se il destin ur prometeve alc di sest. Je lis mandave vie simpri contentis, siguris che di li a pôc a varessin cjatât l’om just, biel, bon e bon paron.
A disin ancje che e rivave a vuarî malatiis che nancje i miedis a rivavin a comedâ. Par solit la int no si fidave ma cualchidun, plui coragjôs, al zure che cui bevarons che i veve fat bevi jê, al jere vuarît di cetantis magagnis che al veve intor.
Je no voleve sei paiade par chescj servizis, ma se tu i puartavis une sporte di verduris o un salam o cualchi muset, no diseve di no.
Il miedi dal paîs po al rideve di jê: “No stait a lâ de Gjenovefe, che us invelene!”. Lu diseve di sigûr par no pierdi clients, ma dentri di se il dubi che i bevarons di Gjenovefe a fossin miôr des medisinis che al ordenave lui, lu tormentave.
Il miedi, che al sofrive di un mal di schene cronic che dispès i faseve viodi lis stelis, lis veve provadis dutis par vuarî e i miôr professôrs che al veve interpelât i vevin dit ducj che la schene e sarès di operâ ma al varès riscjât di finî suntune carocele; cussì lui, pûr di no lâ in piês, si jere rassegnât a tignîsi la dulie. Une biele dì al va a cjatâ Gjenovefe e cjapant il discors a la largje al tache a tabaiâ di duliis ator pe schene. Jê, che e veve capît subit che il miedi al veve cheste tare, i fâs bevi un bevaron dai siei e lu mande vie.
Rivât a cjase, al miedi i sbroche un moviment di cuarp cussì fuart che i tocje sierâ l’ambulatori par malatie e al pense subit al bevaron che i à fat bevi Gjenovefe. “Spiete tu!” al pense il miedi rabiôs, “A pene che o stoi miôr o voi dai carabinîrs a denunziâ chê osteade, che e à tentât di invelegnâmi!” Po al pense che se si ven a savê che ancje lui, miedi, al è stât de strie, al sarès stât sputanât par in vite. Cussì, rugnant, al spiete che i passi. Daspò une setemane il cagot si ferme e cun cetante maravee il miedi si inacuarç che il mal di schene al è sparît.
Cumò il miedi al va dispès a cjatâ Gjenovefe e simpri cuntun pacut di cafè o une butilie di vin bon.
Nol à plui dit mâl da la strie.

di Pauli Jacuz

1 coments On La strie

  • Ogni paîs al veve le so strie, le nestre locâl oltri a jessi buine di fa i bevarons a seont lis varîs necessitâts domandadis, e jere un grum brave di lavora l’ ort, in primevere e faseve cresi lis fraulis come miluçs, dentri e veve ogni ben di Dio, l’ ort al jere a confin de strade e al jere un grum facil jentra, ma nissun si fidave di lâ a robâ la dentri,un dì Saneto ai domande ” ma tû sestu strie par dabon? ” no noo, a lu fâs par no spindi bêçs a compra le filiade par cintâ l’ ort. Lussian

Scrîf un coment

This site uses Akismet to reduce spam. Learn how your comment data is processed.

Site Footer

%d bloggers like this: