ScueleCurte: i compits di Setembar!

E dopo tant spietâ, il prin di Setembar al è rivât e… si torne a Scuele!

E come in dutis lis scuelis, il vuestri Dirigjent Scolastic al è ca par dâ il benvignût a ducj, sedi i vielis students, che aromai a san ben cemût che e je une competizion fra scritôrs, sedi ai gnûfs, che magari pe prime volte a tachin a scrivi contis par furlan e a son emozionâts e plens di voie di fâ ben. Par cumò, in classe, o sin in 29, un numar pardabon alt par la nestre piçule realtât. Ma o sperìn magari di tirâ dongje cualchidun altri, stant che la scjadince pe prime conte di mandâ (2000 caratars) e je ae fin dal mês e stant ancje che a son vignûts fûr i compits.

Sì che duncje, disìn un dôs peraulis sui argoments che i professôrs dal nestri Consei di Classe a àn sielzût par stiçâ la creativitât dai nestris students.

Pe materie regjine de nestre scuele, il professôr P.K. al à sielzût nuiemancul che un Contecurtâr di gale, il nestri Famei Checo Tam, che magari cualchidun si è dismenteât che al è ancje un dai scritôrs plui origjinâi e poliedrics dal panorame de leterature furlane. Se us plâs scrivi di aliens, di fantasimis, di atmosferis gotichis o ancje dal timp che al è lât e nol torne plui, o parcè di no, de musiche scure dal secul stât… bon, cun cheste ispirazion di FURLAN o vês une vore di stiçaduris.

Par la LENGHE FORESTE, dut câs, chest mês al è stât un intop. Il titolâr de catedre al à scugnût rinunziâ al so dicasteri propit doi dîs prin di tacâ e il Dirigjent, ven a stâi jo, al à fat suplence lant a sielzi nuiemancul che Tullio Avoledo, un scritôr furlan che al à scrivût libris che aromai a son di scugnî lei se si ame lis storiis ucronichis e distopichis cun dentri il Friûl. Ancje ca, sedin aliens, sedi fantasience sociâl, sedi soredut la provincie dal nord est, si fevele di critiche sociâl e fantasie.

Une vore plui seri l’argoment sielzût dal docent di STORIE, che al è lât a cjoli lis Comugnis furlanis, element storic che no ducj a cognossin e che si preste a ambientazions storichis e storiis di etis une vore indaûr, ma ancje a storiis di cumò che a fevelin dal ben comun… Insome, ancje ca al è ce sielzi.

E la brene vierte le à lassade ancje chel di TECNOLOGJIE, che al partis di un ricuart personâl par dâ un sens a la peraule tramai che al va ben plui indevant dal ogjet che al à ce fâ cui surisins o lis besteutis. Tramai al pues sei dut… Baste vê fantasie.

In MUSICHE invezit si cole sul sigûr, proponint doi artiscj furlans di cumò une vore sosfisticâts e innomenâts e une suaze che ju à tignûts adun. La Suaze e je chê di SUNS Europe e i doi cjantautôrs a son Massimo Silverio e Nicole Coceancig. E che sedi la musiche, che sedi une cjante o un test, che al sedi il Festival o i siei partecipants… bon, ispirazions a son a manete.

E SIENCIS? O sin nuiemancul che sul toc, dopo une Istât come chê che o vin vude, parcè che si fevele di cjalt e di ce che al pues causionâ e ce fâ par parâsi. Une biele lezion che a pues puartâ a storiis cjaldis, ma sperant di no scotâsi. Lassant in pâs la Tour Eiffel… forsit.

Chestis lis sîs ispirazions par Setembar.

Cumò i nestris students no àn di fâ altri che sielzi la materie, scrivi la conte in 2000 batudis e mandâle, savint che la CorseCurte al è un divertiment e al covente soredut a stiçâ la creativitât, a gjoldisi intal scrivi par furlan e ancje intal jessi dentri cheste comunitât che e je Contecurte.

Sì che duncje… Bon an scolastic a ducj e buine scriture!