ScueleCurte_Musiche09: SUNS Europe

Cun chist articul, tachin a scandaiâ il mont, un mont vîf e vivarôs, de musiche in Lenghe. Ma prin di dut, slargjin il cjamp di azion, e anìn a viodi ce che sucêt a Udin, fin dal 2009.

Chel an, prime edizion di SUNS Europe. Il Festival dai musiciscj che a cjantin te lôr Lenghe, une Lenghe minorizade. Popui “cence Stât” che però, come che o savìn ben, no àn bisugne di un Stât, e che a vivin la lôr Culture cun sentiment e cun impegn.

Chel che ogni an SUNS Europe al fronte, une organizazion a nivel european e no dome, che e sostegn la realtât di Popui sotanâts, di altris che, invezit, tal lôr Stât e son ricognossûts e rispietâts.

Ogni an, tal nestri Teatron Zuan di Udin, si davuelç la finâl, l’incuintri e il confront jenfri i Artiscj selezionâts di un grup sielt di competents in materie. Intune setemane, no dome musichis, ma ancje cine, leterature, dutis lis espressions di une Culture, de Culture di un Popul. Denant di un public passionât si esibisin metint in mostre il lôr talent, une Jurie nomenade dai organizadôr e il judizi dal public e stabilssin il vincidôr. La serade finâl e dut il Festival al è compagnât di Radio Onde Furlane, in direte e cuntune programazion specifiche.

Ma a SUNS Europe, ducj e vincin!

Peraulis di vê iniment: Lenghe, Identitât.

Parcé la Lenghe e je il prin modon de Identitât. Parsore di chel modon si fâs sù la Identitât. E tacant a fevelâ di Musichis in Lenghe, l’impuartance dal cjant, de espression, il disvilup di gjenars difarents, come il rock fuart e vivarôs e il rap par Furlan, e lis lidrîs dal nestri folk.

Musiche moderne in Lenghis antighis, cun lidrîs indaûr tai secui: intai agns, o vin scoltât ancje un sunôr leât ae tradizion, ma ancje rap, rock fuart, cjantautorât, sperimentazion, fintremai metal. Autôrs deventâts famôs, innomenâts a nivel talian, altris restâts te ombrene. Ma ogni an, o vin scoltât cjantis e musichis degnis di chist impuartant palc. Indicadôr di une curie e di une incressite evidente. SUNS al è il palc, il Furlan al è la fuarce, il motôr. Il segnâl di une Lenghe vive, moderne tal rispiet de tradizion.

E SUNS Europe al devente ancje le suaze par meti in mostre i nestris talents. Doi noms su ducj, Massimo Silverio, preseât e sossolât de critiche taliane che e sta daûr ae musiche alternative, cun zîrs ator per Italie simpri plui plens di int, e Nicole Coceancig, vincidore dal Premi Ciampi tal 2024. Doi mûts di puartâ indenant il Furlan. Sperimentazion par Massimo, cjantautorât alt par Nicole. Cul lis lidrîs ben insedadis te nestre Culture. Le nestre Lenghe plui che mai vive!

SUNS Europe 2026 al è zaromai pront.

Anin a fa casin! (cit. “Cum on Feel the Noize”)

Materie: Musiche
Mês: Setembar
Prof.: M.A.