ScueleCurte_Storie09: Lis Comugnis Furlanis

Al sucêt ancje in dì di vuê in Friûl, ancje se no masse dispès, di sintî a fevelâ di ûs civics, o sei di un model di gjestion comunitarie di cierts bens, sedino cjamps, boscs o lagune.

A son juste i ultins slambris di un patrimoni cetant grant che par secui a dilunc al à segnât la storie economiche e sociâl dai furlans. La presince di tieris coletivis, ven a dî di terens gjestîts e doprâts di une comunitât pes sôs dibisugnis – par passonâ i animâi, cjapâ sù lens, pescjâ e v.i. – si le à bielzà in ete prelatine e, cun modalitâts di gjestion e nons diferents, le ricjatìn ancje te Ete di Mieç. Dispès e rapresente un element di fonde pe sorevivence economiche di une comunitât, o almancul dai siei membris plui puars.

Dut câs, propite pe antichitât di chescj ûs, al jere dificil che lis comunitâts a vessin in man i titui formâi di proprietât su chestis tieris. Intal câs dal Friûl, contrari di ce che al jere sucedût in ete patriarcjine cuant che i dirits des comunitâts a jerin stâts rispietâts, la Republiche di Vignesie e decît di espropriâ ducj chei bens coletîfs – cognossûts par furlan come “comugnis” o, plui indenant, “comunâi” – che no vevin documents in stât di provâ la plene proprietât des comunitâts locâls. Ancje se sul imprin chescj bens a vegnin lassâts in ûs ai comuns rurâi sot forme di concession, la Republiche di Vignesie – massime vie pal Sîscent cuant che si cjate a frontâ une crisi economiche biele penze – e decît di fâ casse cu la vendite dai comunâi.

Chest procès di alienazion al va indenant ancje dopo che il Friûl al è passât dut sot dai Asburcs e al varà lis sôs ultimis codis sot dai Savoia. Par vê une idee di tropis che a fossin lis comugnis furlanis e di ce pês che a vessin, baste pensâ che, dopo cuasi doi secui di venditis sfuarçadis, intune inchieste dal 1819, ven a dî sot dal Imperi di Austrie e Ongjarie, te “Provincie dal Friûl” a jerin ancjemò 167.000 etars di tieris coletivis.

La privatizazion des comugnis puartade indenant des autoritâts statâls e je stade une vore lente e dificile, soredut par vie de oposizion des comunitâts rurâls. Cun di fat, inte storie dal Friûl a son cetancj i episodis di violence leâts ai tentatîfs di privatizâ lis tieris coletivis, ancje cul riviel di paîs intîrs. La resistence e je stade ancje plui fuarte cuant che a tentâ di usurpâ lis comugnis a jerin i nobii locâi, in cierts câs cun procediments judiziariis che si strissinavin par disinis di agns, in altris cun azions violentis.

Par capî a ce nivel che e fos rivade la lote par difindi lis tieris coletivis si pues ricuardâ un episodi capitât tal 1841 a Sant Denêl. Ai 13 di Mai, cuant che e varès di tignîsi la aste par fitâ une part dai bens comunâi, la place principâl e ven invadude di centenârs di personis e il palaç dal Comun al ven ocupât de int. Tes zornadis seguitivis, par permeti di fâ la aste, lis autoritâts austriachis a fasin ocupâ il paîs prime di un centenâr di soldâts mandâts sù di Udin e po di altris 140 rivâts di Padue. 103 oms di Sant Denêl a son arestâts e a finissin sot procès. La ocupazion militâr e lis protestis a van indenant par un biel pieç (ancje cun cartei anonims come chel indreçât ai aministradôrs comunâi considerâts responsabii dal usurp: «Pro memoria Narducis, ti taiarìn a fetucis; Franceschinis, ti maçarìn a ûs des gjalinis; Pilar, ti maçarìn cul zilar; un deputât mincjon, chel altri bricon e il segretari ladron»). Intal 1848, invezit, intant che la borghesie liberâl e une part de possidence si deve dentri tai moviments filotalians, i contadins, une volte cjapadis sù lis armis, invezit di fâi cuintri ai austriacs a ocupavin lis tieris coletivis privatizadis, come a Visopuli, Cordovât e inaltrò.

Trop che il dirit coletîf di gjoldi di chestis tieris al fos part de mentalitât dai furlans si lu capìs ben dal numar di denunziis par reâts “cuintri dal patrimoni” che si àn ancjemò a distance di cetancj agns de privatizazion des comugnis. Giovanni Cosattini, inmò sul prin tacâ dal secul XX, al lamentave cemût che, contrari di chei altris reâts, i “delits cuintri de proprietât” a fossin in Friûl un grum plui alts che no in Italie: un fat che – al spiegave – al vignive propite de usance de int di lâ a cjapâ sù lens e pomis, o a passonâ i animâi ta chei terens che une volte a jerin comunâi.

I cantins peâts aes comugnus, duncje, a son tancj: dai episodis di resistence armade (ancje tal 1511 une des causis che a àn stiçât il riviel des comunitâts rurâls a jerin i tentatîfs dai nobii di usurpâ lis tieris coletivis) ae impuartance che a vevin pe vite economiche, sociâl e ancje “democratiche” des antighis comunitâts furlanis. Magari cussì no, i studis su cheste part de storie dal Friûl a son mancul di ce che si spietaressisi e no simpri facii di cjatâ.

Materie: Storie
Mês: Setembar
Prof.: P.C.

1 comment