Scuelecurte_Siencis09: Ce cjalt, ce frêt

Il calôr dal Soreli al è indispensabil pe vite e al fâs ben ancje ae nestre salût.
Studis sientifics a disin che un cîl neri e plen di nûi al procure depressions periodichis che a cjapin ciertis personis intai mês dal Autun e dal Invier.
Di fat la mancjance di lûs, pal cîl nulât e pes gnots plui lungjis e influence ancje il nestri umôr par vie de azion che la lûs e fâs sul  nestri organisim, soredut pe produzion di melatonine e serotonine de bande dal cerviel.
Al sucêt che cuant che e mancje la lûs dal Soreli si alce la produzion de melatonine, un ormon che al regole i ritmis biologjics dal sium e al sbasse la produzion di serotonine che e regole il ton dal umôr.
Ma il soreli al pues ancje jessi pericolôs.
Une temperadure che e va sù di là dal limit di sopuartazion dal nestri cuarp e pues causâ un colp di soreli, cuant che la temperadure dal nestri cuarp si alce a cause de azion dal soreli che al scjalde masse la nestre superficie cutanie e che e prodûs une grande sudorazion che e puarte ae disidratazion. Cun di plui la azion direte dal soreli sul cjâf e alce la temperadure dal crani ancje di là dai nivei di sorevivence des celulis dal cerviel e a cause di chest si cole intun stât di incussience.
In  câs di colp di soreli  si sint un fuart mal di cjâf, inzirlis e confusion tal cjâf e parfin si pues rivâ ae  vuarbetât. Si alce la temperadure sui 40°, il pols al è piçul ma che al cor, il colorît prime ros vîf e daspò palit.
Ce fâ in câs di colp di soreli?
Sotetâsi intun puest fresc e parât dal soreli (e no  restâ in splaze sot dal ombrenon!), metisi un linçûl umit e fâsi spugnaduris cun aghe frescje, aiar cuntun gjornâl, un libri o un ventiladôr, fintremai  che la temperadure e torne sui 37-38° . Clamâ il 112.
Un altri efiet negatîf dal cjalt al è chel  dât dal colp di calôr che si verifiche cuant che une persone si cjate intun lûc sierât e tant cjalt (come intune machine lassade sot dal soreli in plene Istât), no ben areât e cun tante umiditât.
Il cuarp in principi al reagjîs al calôr cul sudôr ma che nol svapore e al stagne su le piel e nol fâs produsi altri sudôr. La temperadure dal cuarp alore e continue a alçâsi e e pues superâ i limits de sorevivence des celulis cerebrâls.
Il malât alore si sint scanât, cun mâl di cjâf, inzirlis, nausie, agagns, respîr acanât, piel prime umide e dopo secje, pols piçul ma che al cor.
Ce fâ in câs di colp di calôr?
Lâ intun puest fresc e metisi in posizion sentade, bevi aghe frescje cun mieç cucjarin di sâl o bicarbonât. Clamâ il 112.
E il cjalt lu sintin ducj, lu sint ancje la Tor Eiffel.
Cul cjaldon ancje la Tor Eiffel si dilate e e rive a slungjâsi fintremai di  15 cm!

Materie: Siencis
Mês: Setembar
Prof.: A.M.