ScueleCurte_Tecnologjie09: Il tramai

Mê mari, par tirâ sù doi francs, e faseve i telarins. A saressin lis sentis des cjadreis impaiadis che Manzan al vendeve ator pal mont. E lavorave a cjase, in neri, a cotim, come che si faseve fin ai agns otante. Prime di tacâ il lavôr si preparavin i glimuçs di cuarde di paie che si dopravin par impaiâ. Al jere un lavôr che al tocjave a mi, o bruntulavi simpri un pôc prime di tacâ e o cirivi ancje di scuelâ gno fradi piçul, ma no jerin ancjemò rivâts i agns che o sarès deventât un bon insegnant.
Par fâju si veve di cjapâ la cuarde in man e fale zirâ ator dal comedon par trê voltis, fate cussì la base le si zirave e si involuçave dute ator ator la cuarde fasint sù un biel glimuç, cu la stesse tecniche che si dopre par fâ sù il fîl di une prolungje eletriche.
I prins tu ju fasevis in un lamp ma chei dopo a domandavin simpri plui fature e chei dopo ancjemò ju varès fats mê mari.
Un biel dì al è rivât a cjase gno parì, nus à clamât e nus à mostrât un gnûf argagn che al veve fat di pueste par fâ su i glimuçs: un “tramai”.
Al jere une struture fate cui lens di Manzan(*) cun doi rimpins a lis estremitâts e une manovele di une bande. Tu fasevis passâ la cuarde sui doi rimpins, come che a fossin la man e il comedon, e dopo tu tacavis a menâ la manovele. Intun lamp tu fasevis su un glimuç, doi, trê, e ducj chei che a coventavin. In curt jo e gno fradi o sin deventâts mestris tal lavôr e o barufavin par doprâ il tramai, almancul par i prins timps.
Un tramai al è un argagn, un imprest metût adun cun robis che a fasevin altri, spes riciclant i scarts. Al pues capitâ che al sedi simpri stât li, sot dal nâs, nol jere platât ma nissun lu viodeve.
Tantis voltis, fat un tramai, ducj lu copiin e a van ator cun braùre, come se lu vessin inventât lôr. Des voltis i dan un non, des voltis lu perfezionin e lu vendin. Altris voltis al reste dome un tramai che al risolf un probleme.
Lis storiis cun dentri un tramai a son une vore, se si à voie o gole di scrivilis.

Materie: Tecnologjie
Mês: Setembar
Prof.: B. M.

(*) I lens di Manzan a son fats cui scarts dal len lavorât, no brusin come un len di arbul ma a van ben par impiâ il fûc o par fâ tramais.

1 comment