fbpx

Contecurte Day 2019 – Dîs Dîs Dîs

Contecurtârs! Sêso pronts!
Viso uçât la tastiere? Vêso pensât a une biele storie? Vêso fat alenament cu lis contis dai dadui?
Benon! Parcè che la gnove di vuê no je une conte ma je une date.
La date dal CONTECURTE DAY 2019, l’event che ducj i contecurtârs a spietin, la gare di contis par furlan biele di dutis lis osteriis leteraris.
I contecurtârs di vecje date a san za di ce che si trate, ma no lu spieghin par ducj, ancje chei che a àn voie di provâ a partecipâ al event plui di gale de nestre ostarie.
Se fin cumò si stâts a Listize, Flambri e Passarian, chest àn o vin sielzût la patrie dal Ostîr: Sclaunic! Parcè che chest an nol è un come ducj chei altris.
O son dîs agns che la ostarie di Contecurte e je vierte e che e va indevant a publicâ contis.
E alore cuâl al puedial sei il teme di chest an?

Dîs Dîs Dîs!

Un teme facil di ficjâ intune conte che la rint cuasi a teme libar. Interpretaitlu tant che numar o tant che verp o tant che sostantîf… al è compâgn. Che in cualchi maniere, dentri te conte, al sedi il Dîs.
Podopo lis regulis a son simpri chês. Des contis che rivaran al Ostîr a partî di… cumò, a vignaràn sieltis 12. E ducj a puedin partecipâ, parcè che in gare, come simpri, e je la conte, e non il contecurtâr. Par chest, i autôrs de conte a varessin di jessi i unics, insieme al Ostîr che lis ricêf, a savê cui che al à scrit une storie. Al tocjarâ dopo ai nestris letôrs puartâ indevant e fâ vinci la conte che i capite di lei.
Il limit di lungjece nol è cambiât e in cheste ocasion no je nissune tolerance, lu savês: 2000 batudis comprendûts i spazis.
Come par solit, al sarà il public presint a votâ la conte che e rivarà insomp e a sielzi il vincidôr de disfide, e par chest us racomandìn di no disvelâ a di nissun cuale che e je la vuestre conte.
Come simpri ducj i gjenârs a son acietâts e anzit, meteit man ae fantasie e no stêt vê premure. La date dal contecurte day e je Vinars di sere ai 26 di Avrîl, te sale de Canoniche di Sclaunic. E l’event al è sot dal sburt de Pipinate di Sclaunic. Lis contis a van mandadis al Ostîr, te solite mail di Contecurte, dentri dai 21 di Avrîl. Date dopo la cuâl si comunicarâ lis dodìs contis sielzudis par la gare, su dutis chês rivadis. La sielte des 12 contis, se ‘nt rivin di plui, e sarà sot il judizi dal Ostîr e dai siei fidâts colaboradôrs.

Nus pâr di vê dite dut. In curt al rivarà il volantin e l’event sul muselibri, ma intant o podês tacâ a pensâ ce scrivi!
Domandait se us covente intai coments a chest post e sparniçait l’event dapardut, sedi doprant fb, sedi invidant a lei chest articul. E plaseit la pagjine fb par restâ inzornâts
Us spietìn ducj, ancje se no scrivês contis, se no altri a fâ fieste par il Complean di Contecurte!

3 coments On Contecurte Day 2019 – Dîs Dîs Dîs

  • Compliments a le ostarie di contecurte indulà i gjestors si fasin in cuatri par fa si che il bocâl vedi il vin plui preseât a sodisfazion dai soi aventôrs. Lussian

  • Compliments ancje di part mê. E je une ostarie fûr dal comun. Come che al dîs Dario Zampa intune des sôs cjançons: – Che al sedi blanc, che al sedi neri, baste che al sedi bon. – Prosit, salve, dut al ven ben.

  • Pingback: Scrivi une Conte Curte | Contecurte ()

Scrîf un coment

This site uses Akismet to reduce spam. Learn how your comment data is processed.

Site Footer