“NEE NED ZB 6TNN DEIBEDH SIEFI EBEEE SSIEI ESEE SEEE !!”.
La NASA a li à dadis fûr nome cumò chestis fotos fatis de sonde Mars Reconnaissance Orbiter tal mês di Març di chest an, e di bot si è discjadenade ogni sorte di fantasie su ce ch’al podarès volê dî chel scrit sculpît su la scusse dal planet Mart. Lant daûr dai plui azardôs chei ponts e liniis ch’a si viodin, no son altri che peraulis in alfabet Morse, une sorte di anunzi che i Marzians a nus mandin viers la Tiere, ma dut ancjemò di capî, ch’al sarès:
“NEE NED ZB 6TNN DEIBEDH SIEFI EBEEE SSIEI ESEE SEEE !!”.
I sienziâts a son scuasi sigûrs ch’a son formis fatis dai grancj aiarons ch’a soflin sul planet, ma lis fantasiis a no si fermin mighe nome parcè che la sience e à cjatât il parcè, e inalore ju ducj a dî la lôr.
I plui esperts di storie antighe a so sigûrs che Mart, il diu de vuere pai Grêcs, al vedi dit:
“Chel bastart di Paride a i à metûts i cuars a Menelau, al à di murî”.
Là che invezit chei ch’a studiin i jeroglifics a disin ch’a nol pues jessi altri che:
“Cleopatre a i à metûts i cuars sedi a Juli Cesar sedi a Marc Antoni, bule jê”.
I plui modernis, cjalant a font lis fotos, a sostegnin che i segns a son une vore plui zovins e a rivin fintremai al dî di vuê, si che duncje un DEM di sinistre al dîs:
“La leç eletorâl e je une porcarie piês di chê di prime, covente mandâ a cjase chel ch’al à scrite”,
un altri tifôs de Nazionâl invezit al zure che:
“Pellè e Zaza a son stâts comprâts dai todescs che àn paiât i Cinês ch’a nus a i puartin fûr des scjatulis”.
E chi al è plui che mai dificil metiju dacuardi ducj.
di Bepi Zefon
#588
5 comments On Alfabet Morse su Mart
Si à di lei Marc Antoni al puest di Marc Aureli.. Bepi
cambiât!
Jo, Bepi, o mandarês su Marte Lussian magari cun Pauli. Lôr doi e son maestris in Alfabet Morse. Magari prime di fâju partî al sarès il cas di fâur a ducj i dôi un côrs acelerât di storie romane e un su lis contis di Omero. Biele Conte. Ironiche e simpatiche.
Nelo, pecjât che la navete ExoMars e je partide tal mês di Març, ch'a podevin mandâ sù Lussian e Pauli. Ma podaressin scomençâ l'istès stant in Tiere, studiant in segnâi di fum dai Indians des Americhis o ben di chei che te Ete di Mieç a si mandavin i soldâts di Cjistiel in Cjistiel. Te ere moderne par provâ lis telescriventis a si scriveve un test ch'al diseve: "The quick brown fox jumps over the lazy dog", ch'a si provavin plui e mancul dutis lis letaris de lenghe inglese, ma voltade par furlan e diseve: "La svelte bolp maron a i salte intor al cjan sflacjon". Si che duncje s'al va ben par une lenghe a no va ben par une altre, ma si podarès tentâ l'istès. Bepi
I puntins e van ben ma lis linis son masse lungjs,forsit l'enigma todescje rivaress tira fur alc.Di chel poc che ai capit al par che propagandin la vicinance di un chiosco di pizzis.A part i scherçs, ma un gracjs sancir a Bepi che nus ten aveduts su chests grancj aveniments. Lussian