Al jere rivât tart cul tren a Tisane e dopo sù, cu la ultime coriere a Rivignan, la ultime dì di Otubar. Ducj i emigrants a tornavin pe fieste dal paîs, come i spirts.
Al jere biel, ducj si devin dongje, a viodevin amîs e int di famee, a bevevin e a contavin storiis, no si sa se veris o inventadis, di mieze Europe. Ma lui, di contâ e di sintî storiis nol veve plui voie, nol voleve nancje plui viodi int: i sarès plasût sì vivi cun lôr, cu la sô famee, cui siei amîs, maridâ Gjovane, ma aromai si veve studât dut. Ce vevial di contâ, che cundut des promessis il so amôr al jere finît? Che al leve tal jet cu lis belghis, maridadis cul prin paisan che a vevin podût e che cumò si contentavin di lâ cui forescj, fasint fente che la pice o la rabie a fossin passion? Che i siei siums a jerin restâts sepulîts jù in miniere? Miôr tasê, miôr sierâsi te cjase di puar so pari, che al jere lât cun Gjo ancje lui: un glon di plui di fâ sunâ ae cjampane. E spietâ che a passassin chei dîs, par tornâ vie cu la scusse plui dure, par no viodi a vivi difûr chel Friûl che i murive dentri vie.
di Spirt Anonim
#249
