CorseCurteAvrîl#22 – Pandolo, un poleç stupit

#22 – Pandolo, un poleç stupit

A son varietâts di gjalinis che a fasin l’ûf celest. Lu savevistu? Ben, gjo, no lu savevi nancje jo.
Fintremai che, une dì, o fevelavi su la coriere di cjamps e bestiis cuntune mê amie di Montegnà, che mi à dite di vê gjalinis che i fasin l’ûf colôr celest. E al è celest ancje drenti!
Tornât a cjase, chê dì, o fâs a mê none: «Di po, vino mighe di meti sot une tô gjaline cui ûfs de mê amie?»
Figuriti se la none e podeve dîmi di no. Pardabon e à scugnût sotlineâ che jê no ju varès nancje cerçâts; dut câs l’afâr al jere fat. Puartâts dongje i ûfs e finîts chei vincj dîs di cove, a son nassûts cuatri poleçuts.
I mês a passavin e tal gjalinâr al someave jessi dut trancuîl. Rivade la Vierte, un smalitament di ormons di no crodi. E chi e tache la storiute.
Dolo, un dai poleçs grancj, al à scomençât di une dì a chê altre a inamorâsi di une des checutis dal ûf blu.
«Mirta, oh Mirta! Chê gjalinute mi plâs masse! E je tant speciâl, e fâs un ûf che al è alc e ce!» al contave a un amì. «O varès cetante voie ancje jo di savê fâ i ûfs! E salacor celescj, come chei di Mirta!» al leve indevant.
«Totul, no ti jeristu visât che tu, i ûfs, no tu podaressis fâju?» i diseve une des gjalinis vieris. «Parcè po!? Ancje jo o ai pursì la buse!» al protestave lui.
«Si capìs, Dolo. Ma di chê tô buse al pues jessî nome alc altri, stupidel».
«Cumò o voi di Mirta e i domandi se e vûl metisi insiemi cun me. Cussì o profiti ancje par fâmi insegnâ a fâ i ûfs celescj» al à pensât Dolo fra se.
Ma Mirta, che un tic plui svelte e jere, je veve molade: «Gno cjâr Dolo, se tu âs dute chê voie di imparâ cheste art, tu âs di svolâ tal Cile, dulà che a talpetin lis mês antenadis. Jo o ai di restâ ca e fâ l’ûf ae mê parone. Tu va, o ti spieti simpri chenti, tant che une buinissime forsit la miôr amie».
Dolo cualchi alc al jere restât mâl di jessi stât metût in bande a nivel di un amì; ma al veve miôr la cuistion dal ûf. E si jere talmentri convinçût, che al voleve pardabon partî pes Americhis. Ma tal gjalinâr aromai lu vevin ducj sorenomenât “pan-Dolo”, e i ridevin daûr.
Che po, si sa, a son propit i pandolos a “fâ ridi lis gjalinis”, come che si dîs…

di Tommaso Pascolo (Cuelalt)
#1253