CorseCurteAvrîl#21 – Il famei

 

#21 – Il famei

No fâs par svantâmi, ma o soi pardabon un figo: moro, cui voi verts, fisic slançât e agjil.  E fevelant dai cops injù, mi disin che o ai ancje cjâf, che a ‘nt sai une plui di Pitac. Ducj a pensavin che no varès bacilât a cjatâ un bon lavôr, ma no je lade propit cussì.
Il gno prin lavôr al jere intun ufici: mi someave il puest ideâl, o vevi une poltrone comude e fofe… par mirinde o puartavi un surisin… Ben po, dopo pôc mi àn parât vie par motîfs di igjiene. Propit a mi, che i ten a jessi simpri net tant che un bleon di bugade!
O ai provât tal cjamp de deratizazion: a disinfestâ o jeri il miôr, lis rognis a son saltadis fûr cuant che mi àn metût a vuidâ la camionete. Purtrop jo o sufrìs di narcolessie, une alterazion dal sisteme gnervôs che e puarte a indurmidîsi di colp. Se no duar almancul sedis oris in dì, no soi bon di gjavâ un gri de tane. Tal imprin o cirivi di tignî dûr, ma un dì mi soi cjatât cu la camionete tal mieç de place dal marcjât jenfri un grum di barachins sdrumâts… Par fâle curte, mi àn parât vie ancje di là.
Un dì o leievi la pagjine dai avîs economics, o ai vût un lamp, ve ca ce che al jere scrit: Specialista in Neuroscienze e Tossicologia cerca assistente anche senza esperienza, indispensabili pulizia e discrezione, inviare il cv a jelenaolaffdottir@montvelenosis.com.
O soi lât a fâ il colocui: “Viodial, sâr Silvestri, jo no ai bisugne propit di un assistent, dome che in dì di vuê no si pues scrivi dut clâr e sclet, saial, cuistions di pari oportunitâts… Jo o cîr pluitost un famei, par tignî di voli il laboratori cuant che o soi fûr cun clients e par assistimi tes operazions di tossicologjie. Duncje al è indispensabil che al vegni a stâ tal gno apartament e purtrop no pues nancje garantî des zornadis libaris. Ma al viodarà che il lavôr nol è pesant e che al sarà ben ripaiât.”
E cussì e je tacade la mê gnove vite. La mê parone e à un grant sens dai afârs, ma ce che mi plâs di jê al è il so lât feminin: cuant che no je daûr a preparâ i siei velens, mi cjarine cun vôs dolce e jo o voi in brût di violis. Mi ven di ronronâ: cui isal plui apaiât di me?

di Atletic Gjatui
#1252

3 coments On CorseCurteAvrîl#21 – Il famei

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît