10 di Avost dal 2023

Zaraton a Sclaunic

Sclaunic, ai 10 di Avost dal 2023
Daûr de glesie

O vês di savê che chest an, nuiemancul che inte date de Fieste de Patrie, il nestri Ostîr al à burît fûr il so gnûf libri, che al je, nuie di mancul, che il so prin romanç, ancje se lui, su cheste robe, al tichigne simpri un pôc. Lui al dîs che Bisest, il libri dal San Simon 2019, che in pratiche nol è stât mai presentât inniò, par vie dal infet, ben, lui al dîs che chel al jere un romanç, si ben fat di contis. Ma se o pensìn a un romanç vêr, cui stes personaç che a scomencin e finissin la storie, Zaraton al è chest romanç, e il biel al è che dopo de presentazion a Codroip inte date de jessude, nol à mighe fatis altris!

Si che, al à pensât ben, daspò di vê metût sù un spetacul complès, in plui lenghis, cun dentri musiche e imagjinis, cuntune senografie ad hoc e soredut cuntune maniere origjinâl di contâ la storie, di regalâ chest spetacul al so paîs, che al veve une serade libare prime di tacâ la sagre di Feravost.

Chei de Pipinate, che cuant che si metin in vore a son soversîfs tant che Chei di Contecurte, a àn preparât ogni robe, comprendût il prestit di Stiefin Pandolfo tant che atôr di meti dentri tal spetacul e di Luca Pagot a vierzi la serade cuntune presentazion in rime scrite di pueste. Zaraton, come che o savês, e se no lu savês us al disìn cumò, al è un libri distopic e catastrofic, che al cjale un futûr che al di rivâ dulà che il Friûl si distache de Italie e al salte fûr che al è une bestie grandonone.

Il spetacul, duncje, al è stât struturât come che al è fat il libri, un plan dulà che si cjale la storie di dentri, di parsore la schene de bestie, e si conte la storie di chei trê personaçs che a àn decidût di no bandonâ la Patrie. Di chê altre bande, dentri di une television, la storie e ven contade di fûr, dal pont di viste di gjornaliscj, sienziâts, int normâl, int fûr cu la cassele…

Cussì, se l’Ostîr al fase la vôs che e conte, ben judât dal Berlon Michêl, a schene (ma propit a schene, eh) e in doi nus contin di Tite, Cristiàn e Marylin, te television si dan la volte la Coghe – che come invasade ipercatoliche no le bat nissun – il prestit pipinatic Stiefin, gjornalist impostât e seri; il Mestri Zuanluche, che al à parfin tirât fûr la statuute di Cthulhu e lu à pronunciât inte maniere filologjicamentri corete, à la Lovecraft. Il dut sot il sapient (ma ce fature par fâlu lâ) powerpointament de Sartore Astrid, e des fotografiis, bielononis, dal nestri insostituibil Muini Stiefin.

La int, numerose come simpri a Sclaunic, nus è parude contente, inmagade de storie (o forsit e jere dome sturnide de machine dal fum) e une altre parte insostituibile de serade a spietâ la sagre e je stade il ghiringhel fat subit daûr, metût adun de clape di Sclaunic e de mari dal Ostîr, che e à fat une fertaie di zaraton e il zaraton impanât… di lecâsi lis scais!