18 di Novembar dal 2023

Zaraton a IdeaNatale

Martignà, ai 18 di Novembar dal 2023
Fiere di Udin

Come che o savês, il plui biel libri par furlan dal 2023 al è Zaraton, dal nestri Ostîr, ancje parcè che se o provais a dîsi di no, la bestie e podarès sveâsi e dâsi une scjassade e nol è dit che o sedis jenfri chei che le scjampin, stant che cuasi ducj i furlans a morin.

Eh, sì. Al è propite cussì che l’Ostîr al à pensât ben di sparniçâ la sô presentazion di Zaraton dentri de suaze dal Città Fiera intun puest dulà che nol jere mai lât (l’Ostîr, no il zaratan… ma nancje il zaratan, a dî il vêr) e meti adun, cu lis dôs plui volenterosis de Osterie, la Sartore e la gjatemarangule, un mini spetacul.

Ti plasaressie scoltâ une storie dulà che cuasi ducj chei che tu cognossis a morin?
Cemût no! E cun di plui, il spetacul al jere mini intal sens che al jere la version curte dal spetacul fat a Sclaunic, cuntun schermi di television gnûf e plui… spartan, e une zonte musicâl di siglis dai TG internazionâi che a fasevin une vore di atmosfere. L’event al jere stât clamât dongje de Kappa Vu, cjase editore dal libri, e ancje se nol jere dal sigûr un puest cuiet e dulà che al è facil fâ une presentazion, l’Ostîr si è divertût e la robe no je vignude mâl. Anzi… la version strucade, dulà che l’Ostîr si cjape su la schene la storie di contâ e la Sartore e fâs la gjornaliste televisive, fevelant inglês, todesc, spagnôl e talian (o cirarin di insegnâi il rus e cualchi lenghe slave, pe prossime volte) e pâr funzionâ une vore ben e le tignarin buine par lis presentazion plui classichis dal libri.

Ve ca alore cualchi fotografie robade intune sabide matine storiche, stant che o vin contât lis vicendis nuiemancul che di une linie temporâl diferente, ven a stâi no dal doman, ma di un passât che in cualchi Univiers al è capitât, ancje se no tal nestri.