1 di Avrîl dal 2023

Zaraton a Codroip

Codroip, al 1n di Avrîl dal 2023
Sala Abaco

Cuant che la Kappa Vu e à decidût di publicâ Zaraton, l’ultin libri par furlan dal Ostîr, e cun di plui di publicâlu propite in timp pe date che la vicende e tache, Rafaêl al veve za tal cjâf chest spetacul. Po dopo, alc al è cambiât e alc si è limât, ma la fonde e je simpri restade chê e o podìn dî ben che chest al è il spetacul plui complès e seri che o vin fat e o fasin ancjemò volintîr, se nus al domandin. La scree e je stade propite intune date simboliche, in chest prin di Avrîl 2023, li de atrezade Sale Abaco a Codroip, che nus à permetût di meti dongje sedi la part leterarie, cu lis leturis, sedi chê visive, cul fumut e lis imagjins, sedi une part plui teatrâl, cuntune television par viodi la storie “di fûr” e un cercli dal timp par contâ la storie “di dentri”.

Se o vês let il libri, la storie le savês, ma magari no lu vês let e alc al va dit.

Zaraton e je la storie di Friûl, une bestie, une creature, bocognone, fate di piere, ma vive e cussiente, che e corispuint nuiemancul che al nestri Friûl, e di chi il non. Zaraton, ta chel Avrîl, si svee, i furlans a muerin cuasi ducj e lui al devente paron dal mont, soredut in gracie dai media, dai social, dal mont globalizât. Par chel di une bande Rafaêl al conte la storie di dentri. Lui nol dîs cui che al è, ma al è parsore di Zaraton, insiemi cui trê protagoniscj, che nus presente il Berlon, cu lis leturis dal libri.

Di chê altre bande, intun monitor fat de gjatemarangule, al è il mont. Il mont fat di Serene, Pablo e Margarite, che a son di volte in volte anunziadôrs dal TG, o pûr invasâts de rêt che a fevelin lenghis forestis come inglês, tedesc, rus, spagnôl… e talian, clare.

Lis fotografiis dal nestri Muini a son une vore bielis e us lassin la idee de robe.

E intant che la storie e va indenant, sul schermi a corin imagjins, metudis adun di Astrid, doprant il fumut di Laurinç e Giulia… Par jessi la scree, o podìn dî che e je lade une vore ben e la int e jere dute inmagade a scuvierzi ce robe che e jere e ce che e faseve cheste creature clamade Friûl, che par ce che o savìn, in cualchi futûr che nol è il nestri, e je inmò ator pai mârs dal mont.