CorseCurteSetembar#11 – Arme improbabil

#11 – Arme improbabil

Calmiti Salvucchio, trai il flât ben planc…: sêstu stât il prin a jentrâ?
Sì. (cul cjâf, che flât no’nt veve)
Cui isal stât a clamâti?
S… sô none
Cuant?
Une mieze ore indaûr.
Ise stade dentri prin di te?
No, al jere doi dîs che no saveve nuie di lui, al telefonut nol rispuindeve, e à scugnût vignî a cjatâlu, e à clamât de puarte cence rispueste, e à cjalât dal barcon e lu à viodût par tiere cussì…
Salvo al fevelave cence çancis, chest al jere il prin muart che al cjatave, la esitance lu superave, lui al voleve jessi degn di fede dal comissari Zingaretti, ma in chest paisut la ocasion e jere fûr dal ordenari: lui si veve alenât, al doveve superâ la trance cun snait.
Sêstu stât a viodi dapardut?
O ai cjalât inte cjamare, intal bagn…
… Âstu cjatât la arme?
No ai cjatât nuie che al somei jessi stât doprât par fâlu… i voi… i voi a son stâts gjavâts fûr… a mancjin…
Eh! sì, a son gjavâts fûr o infondâts dentri, ma ce che mi somee impuartant al è di cjatâ la arme, l’imprest che al à fat il dam. Cemût si clamial?
Percût, Andrea Percût… al veve 30 agns, vedran.
Vevial une morose?
Sô none mi à dit che al jere di timp che no ’nt veve une.
Dulà lavoravial?
Te aziende Nonino, chei de sgnape.
Ce robis fasevial là?
Al lavorave intal capanon de manutenzion, al faseve il marangon prime, i àn dât la funzion di sorevisôr.
Marangon… marangon… âstu viodût se a jerin dai imprescj dal mistîr te cjase?
Nuie a cjase, o soi lât a viodi daûrsi, e je une piçule stanzie plene di robis di tirâ fûr… o vin di clamâ la sientifiche…
Sì, sì, clamile… intant o voi a cjalâ ator.
Zingaretti al vagole, cun il cuarp ma soredut cun i voi, al va a cjalâ sù… lis feridis a son tarondis… Cjale Salvuccio… i voi a son sparîts ma lis orbitis no son slambradis…
Cuasi cence finî la orazion, i voi di Zingaretti si cjatin cuintri une sorte di pinze, cuntun cuarp fin, elegant, e un dissen di pêl di sarpint sculpît te cuarp di fier: i doi manis a son piturâts di sanc.
Note dal autôr: O soi la tierce gjenerazion di une famee di marangons, o ai vût in ereditât i imprescj dal mio nono Vigji e mio pari Remo. Une pinze par mantignî la see uçade e je stade la ispirazion, ma o ai il dovê di sigurâus che nissun uman al è stât ofindût par scrivi cheste storie.

di Marcelo Del Mestre (Argo Patùs)
#1369

2 comments