CorseCurteAvost#08 – Apis Mellifera

#09 – Apis Mellifera

Massachusetts, 2026
“CNN Health welcomes you to this worldwide TV link from the Massachusetts Institute of Technology to experience these epochal moment for planet Earth”.

La reporter de CNN e vierç cussì il colegament in mondovision e dret a tachin a sudâmi lis mans dentri des manecis.
Beeth e je cuiete, cussì le vin clamade cuntun zûc di peraulis jenfri il diminutîf de regjine Elisabete “Beth” e la peraule inglese “Bee” par âf.
La ULTIME âf regjine dal planete e svolete come simpri dentri te sô teche a circolazion di aiar controlade e e sbisie cirint la jessude. Cuissà se e pense a lis blancjis cisis di ortensiis tai bearçs di New Orleans o ae buganvilee colôr di rose che si ingrampe fin sù tai cjascj des perifariis di Charlotte o a lis margaritis salvadiis des pradariis dal Texas batudis dal aiar clip di Mai. Strafonde di semence di avon i bastarès sgarfâ fûr une sfese ta un breâr par tacâ la gnove stirpe… ma nol sucedarà. Dopo dai 3,5 miliarts di muarts che a son stâts par colpe dal virus BeeV+24, l’OMS e à decidût di copâ dutis lis âfs dal mont cjapantsi il risi, mighe di nuie, di drazâ il cicli vitâl de nature…
Lis âfs a son dome portatrici sane dal virus ma ai umans no i fot bielzà plui nuie e a son pronts a zuiâse fin insom. O lôr o nô!

O pii la machinute che e sofle l’etar. Beeth e mûr in pôcs seconts.
Il colegament si siere cun grant aviliment.
Vuê l’uman si è fat Diu in Tiere.
Che il cîl nus judi.

A lûs distudadis o voi a ardi tal incineradôr la puare besteute, biadine, colpevule dome di menâ la muart ai oms, ma salvadore inocente di une nature bondante che e à metût, par fatalitât, i rais tes ruedis al plui bastart dai nemâi de Tiere.

Ma jo o vuei jessi un Diu de Muart, un Signôr de Purificazion, un folc che al tone te Istât dal om e, metint la anidride carboniche al puest dal etar, ti ai dome indurmidide e cumò tu puedis svolâ vie, âf vive, va e plante la tô semence pal gnûf planet e che par nô al tachi l’ultin cjapitul de danazion, plaie sfondrade, bestie umane.

di Rudy Citòs (Borussia Dordul)
#1341

4 comments