CorseCurte#08 – Secondis cjasis

#08 – Secondis cjasis

Par agnorums la mê seconde cjase e je stade la scuele. Mi supave une vore di energjie, ma ciertis comediis cualchi dì.
Ve ca une zornade tip, tant par intindisi.

h 8.30: Pense e scrîf

Cjâf bas sul sfuei, nissun sflade.
Di bot une vôs: – Maestra, guarda Stefano.
Tal ultin banc al gramole la gome di cancelâ. No je la prime che al fâs fûr.
– Ma Stefano, quante volte devo dirti di non mangiare la gomma? Non capisci proprio niente.
– Ce âstu di fâ mo mestre: no puedistu mighe copâmi? – mi rispuint lui par furlan, pacjific come il boro.
No, no podevi. Cumò Stiefin al fâs il becjâr te buteghe di famee.

h 10: Corezions

– Il finale non va; taglialo e rifai – o dîs a Marga che descule e va al puest.
Pôc dopo e torne cul cuader in man; la pagjine e à un biel slambri tal mieç.
– Ma cos’hai fatto? – i domandi scaturide.
– Mi hai detto tu di tagliare – mi rispuint cjandide.
E veve reson: i vevi dit jo di taiâ e jê mi veve cjapade in peraule.

h 10.30: Polse di fûc

Fûr al plûf: tocje zuiâ a moscje vuarbe tal coridôr.
Jacum, bendât, si môf vuidât dai compagns: aghe, agute, fugut e… splaf, cuintri la bidele che e passave cul seglot plen di aghe.
– Sacrament, isal zûc di fâ chest? Cumò tu varessis di cjapâ sù tu – e berle.
Gjavade la bende lui si cjale ator: chei altris sparîts de circolazion.
Di grant Jacum nol è deventât pompîr, ma oculist tal Ospedâl.

h 11: Rimpinâsi sui veris

Diretôr in classe e Martina interogade in siencis.
– Qual è il nome degli stomaci della mucca? – i domande.
– Omaso, abomaso, rumine e… e…
– Re… ret… – al cîr di judâle.
– Rettile – e sclope jê convinte di vêle imbrucjade.
– Veramente la mucca è un bovino – al riduce lui lant vie.
O spietin un secont e po jù ducj a ridi.
Creative fin di piçule, Martina vuê e lavore tal setôr dal design.

Ore 12.30: Jessude

Sara pe presse, in file cu la gjachete par ledrôs. Cumò e lavore a Berlin te Ambassade.

Robis di no crodi, ma dut vêr, po.
Beromai pensionade, la mê seconde cjase e je un monolocâl al mâr, bon dome di supâmi bêçs in tassis.

di Maghe Olstrele (Rosute Pelote)
#1266

3 comments