CorseCurte#05 – La pacare

#05 – La pacare

A cui domandâ? Achì nissun mi scolte. La pacare e je ferme e l’om de pacare al è li che al vaiuce che lui no lu à viodût, cemût podevial, cuant che lu à viodût, ah diu jo! al jere za dut sgnangassât!
L’assessôr i spieghe al inzegnîr che dut al jere a puest, une robe compagne no si podeve spietâse! L’inzegnîr i spieghe al assessôr che lui il so compit lu veve fat, il plan particolaregjât dal gnûf cuartîr residenziâl e ancje il plan de demolizion des vieris cjasis, cjasatis malsanis, dutis malsanis fûr che une, propit chê li, ma no i competeve a lui di. L’assistente sociâl, rivade di corse cu lis mans intai cjavei, i spieghe al mont intîr che jê e veve fat dut in ordin, vitis par cunvinci barbe Tin: us din un biel apartament, us fasìn dut nô, us puartìn vie la vuestre robe, le sistemin ben, ma la cjase o scugnìn butâle jù, sì, o savìn che le vês fate sù vô toc par toc, e je biele, ma e je intal mieç di cheste porcjarie, no viodêso, arbatis, rudinaç, pantianis! Un scaraboç di firme i lu vevin gjavât fûr, dome di visâlu la dì prime che butavin jù, che lui al lave vie par no viodi e jo lu vevi visât, a vegnin cu la pacare, barbe Tin, martars di matine, cunvinte jo che al fos lât di cualchi bande.
E invezit?
Cui savê!
Si sa dome che cumò, puar om, recuie, al è dut sfracassât, che la pacare no va pal sutîl.
A cui domandâ par savê’nt di plui?
Salacor chê piere li, chel bocon di piere e sa alc. E podarès contâ che Tin le veve cjolte sù inte Tôr, le veve staronzade ben, sagomade cun maçûl e scalpel e le veve metude a tignî su la one grande dal cuviert. E li e jere stade par ducj i agns de vite de cjase.
Ma plui di cussì, une piere no sa.
E alore?
No puedarai mighe jo imagjinâ ce maniere che Tin, cence fâsi viodi, al è sbrissât dentri inte cjasute, e al è lât a distirâsi sot di chê piere grande, a spietâ la pacare che e vignis dongje a sdrumâi la cjase. A puartâi vie la vite.
Parcè che chê cjase e jere la sô cjase.
Parcè che la cjase e je la cjase.

di Laurin Zuan Nardin (Lupusinfabula)
#1263

1 comment